‘ए’ डिभिजन लिग फुटबलः कोहलपुर रेसिङ सहाराको सहज जित

खेलकुद

गृहपृष्ठ
खेलकुद
‘ए’ डिभिजन लिग फुटबलः कोहलपुर रेसिङ सहाराको सहज जित

‘ए’ डिभिजन लिग फुटबलः कोहलपुर रेसिङ सहाराको सहज जित

सोमबार, असार ३, २०८१ बागेश्वरी पोस्ट

नेपालगञ्ज । कोहलपुर रेसिङ सहारा क्लबले बाँके जिल्ला ‘ए’ डिभिजन लिग फुटबल प्रतियोगितामा जित हासिल गरेको छ । आज भएको खेलमा कोहलपुर रेसिङ सहाराले कारकाँदो युवा स्पोर्ट्स क्लबलाई ४–१ ले पराजित गरेको छ । बाँकेको कोहलपुरस्थित तेह्र विगाहा फुटबल मैदानमा भएको खेलमा कोहलपुर रेसिङको जितमा आयुश घर्ती मगर, हेमन्त घर्ती मगर, ईश्वर श्रेष्ठ र महेश विकले १–१ गोल गरे । आयुशले ७ मिनेट, हेमन्तले १२ मिनेट, ईश्वरले १६ मिनेट र महेशले ६०औं मिनेटमा गोल गरेका थिए ।

कारकाँदोका लागि सुदिप केसीले ५२औं मिनेटमा गोल गरेका थिए । खेलमा कोहलपुर रेसिङका कप्तान सुनिल थापा प्लेयर अफ द म्याचबाट पुरस्कृत भए । थापालाई श्वेता सेनिटरी सुपर लेसका प्रोपाइटर उपेन्द्र बुढाथोकी, शिवशक्ति नमुना आधारभूत विद्यालयका प्रधानाध्यापक बद्रीनाथ सापकोटाले पुरस्कार प्रदान गरेका थिए । यसैगरी आज भएको अर्को खेलमा मिलन युवा स्पोर्ट्स क्लब र नव दुर्गा युवा क्लबबीचको खेल १–१ को बराबरीमा सकिएको छ ।

बराबरीमा सकिएपछि दुबै टिमले अंक बाँडेका छन् । सुरुवातमै नव दुर्गाले खेलमा अग्रता लिएको थियो । नव दुर्गाका शंकर दमाईले ६ मिनेटमा गोल गरेर टोलीलाइ अग्रता दिलाएका थिए । तर, २३औं मिनेटमा मिलन युवाका सरोज केसीले गोल गर्दै खेल बराबरी गरे । बराबरी गोल गर्ने सरोज खेलको प्लेयर अफ द म्याचको रुपमा पुरस्कत पनि भए । उनलाई समाजसेवी अर्जुनजंग शाहले पुरस्कृत गरे ।

बाँके जिल्ला फुटबल संघको आयोजनामा भइरहेको प्रतियोगिता असारको १३ गतेसम्म चल्नेछ । लिगकम नकआउटको आधारमा भइरहेको प्रतियोगितामा सहभागी क्लबलाई दुई समूहमा विभाजन गरिएको छ । प्रतियोगिताको समूह ‘ए’ मा कोहलपुर रेसिङ सहारा क्लब, धम्बोझी क्लब, नवदुर्गा युवा क्लब, कारकाँदो युवा स्पोर्ट्स क्लब, मिलन युवा स्पोर्ट्स क्लब रहेका छन् । यसैगरी समूह ‘बी’ मा न्यु डाँफे स्पोर्ट्स क्लब, जय किसान स्पोर्ट्स क्लब, रोयल नेपालगञ्ज एफसी र ओशोनिक क्लब रहेका छन् ।

समूह ‘ए’ र समूह ‘बी’ को विजेता र उप–विजेता टिमले सेमिफाइनलमा प्रतिष्पर्धा गर्नेछन् । प्रतियोगिताको विजेता टिमले बाँके जिल्लाको प्रतिनिधित्व गर्दै लुम्बिनी प्रदेश लिग फुटबलमा सहभागिता जनाउने अवसर पाउनेछ । प्रतियोगिता अन्तर्गत मंगलबारको पहिलो खेल न्यु डाँफे स्पोर्ट्स क्लब र रोयल नेपालगञ्ज फुटबल क्लबबीच हुनेछ । दोस्रो खेल जय किसान स्पोर्ट्स क्लब र ओशोनिक क्लबबीच हुनेछ ।

प्रकाशित मिति: सोमबार, असार ३, २०८१ २१:२५