धम्बोझी क्लब ‘ए’ डिभिजन लिग च्याम्पियन

खेलकुद

गृहपृष्ठ
खेलकुद
धम्बोझी क्लब ‘ए’ डिभिजन लिग च्याम्पियन

धम्बोझी क्लब ‘ए’ डिभिजन लिग च्याम्पियन

बिहीबार, असार १३, २०८१ बागेश्वरी पोस्ट

नेपालगञ्ज । धम्बोझी क्लब नेपालगञ्जले लगातार दोस्रोपटक बाँके जिल्ला ‘ए’ डिभिजन लिग फुटबल प्रतियोगिता–२०८१ को उपाधि जितेको छ । कोहलपुरस्थित तेह्र विगाहा फुटबल मैदानमा भएको फाइनल खेलमा धम्बोझीले कोहलपुर रेसिङ सहारा क्लबलाई २–० ले हराउँदै च्याम्पियन बनेको हो । जितसँगै धम्बोझी लुम्बिनी प्रदेश स्तरीय लिग फुटबलमा बाँके जिल्लाको प्रतिनिधित्व गर्नेछ ।

च्याम्पियन बनेको धम्बोझीले १ लाख र उपविजेता कोहलपुर रेसिङ सहारा क्लबका खेलाडीहरुले ५१ हजार रुपैयाँ नगद पुरस्कार, ट्रफी, मेडल, प्रमाणपत्र प्राप्त गरेको छन् । विजेता तथा उपविजेता खेलाडीहरुलाई प्रमुख अतिथि कोहलपुर नगरपालिका नगर प्रमुख पुर्ण प्रसाद आचार्य, आयोजक बाँके जिल्ला फुटबल संघका अध्यक्ष एवम एन्फा सदस्य भोजराज शाही, राष्ट्रिय खेलकुद परिषदका सदस्य दिपेन्द्र विष्ट, एन्फा पूर्व उपाध्यक्ष गोर्वधन सिंह सम्झना, लुम्बिनी प्रदेश खेलकुद परिषद सदस्य जनक केसी, नेपाल पत्रकार महासंघ बाँकेका पूर्व अध्यक्ष निरज गौतम लगायतले पुरस्कृत गरेका थिए ।

बाँके जिल्ला फुटबल संघले आयोजना गरेको प्रतियोगितामा धम्बोझीका क्षितिज थापा मगर सर्वोत्कृष्ट खेलाडीको रुपमा पुरस्कृत भएका छन् । यसैगरी प्रतियोगितामा कोहलपुर रेसिङका सालान परियार उत्कृष्ट गोलकिपर, धम्बोझीका विष्णु कसेरा उत्कृष्ट रक्षक, कोहलपुर रेसिङका विशाल थापा मगर उत्कृष्ट मिडफिल्डर, धम्बोझीका प्रेम कुमार सुनार सर्वाधिक गोलकर्ता र उत्कृष्ट प्रशिक्षकको रुपमा धम्बोझीका दिपेन्द्र घले पुरस्कृत भए ।

असार १ गतेदेखि सुरु भएको प्रतियोगितामा यसपटक बाँके जिल्लामा आवद्ध भएका ९ वटा क्लबले भाग लिएका थिए । प्रतियोगिताको समूह ‘ए’ मा कोहलपुर रेसिङ सहारा क्लब, धम्बोझी क्लब, नव दुर्गा युवा क्लब, कारकाँदो युवा स्पोर्ट्स क्लब, मिलन युवा स्पोर्ट्स क्लब रहेका थिए । समूह ‘बी’ मा न्यु डाँफे स्पोर्ट्स क्लब, जय किसान स्पोर्ट्स क्लब, रोयल नेपालगञ्ज एफसी र ओसोनिक क्लब रहेका थिए ।

चक्र चिमाला क्षेत्री सम्मानित

बाँके जिल्ला ‘ए’ डिभिजन लिग फुटबल प्रतियोगिता–२०८१ को समापनको अवसरमा कोहलपुर रेसिङ सहारा क्लबका अध्यक्ष चक्र चिमाला क्षेत्री सम्मानित भएका छन् । पश्चिम नेपालको फुटबल विकासमा महत्वपूर्ण योगदान गरेको भन्दै आयोजक बाँके जिल्ला फुटबल संघका अध्यक्ष शाहीले क्षेत्रीलाई सम्मानपत्र प्रदान गरेका थिए । मुख्यमन्त्री कोहलपुर गोल्ड कप फुटबल प्रतियोगिताका संस्थापक क्षेत्रीले बाँके जिल्ला ‘ए’ डिभिजन लिग फुटबल प्रतियोगिता कोहलपुरमा आयोजना गर्नमा महत्वपूर्ण योगदान गरेका थिए ।

प्रकाशित मिति: बिहीबार, असार १३, २०८१ २१:५७