कोहलपुरको कृष्ण माविमा १८ लाखको भिम-कमला अक्षयकोष स्थापना

शिक्षा

गृहपृष्ठ
शिक्षा
कोहलपुरको कृष्ण माविमा १८ लाखको भिम-कमला अक्षयकोष स्थापना

कोहलपुरको कृष्ण माविमा १८ लाखको भिम-कमला अक्षयकोष स्थापना

मंगलबार, साउन २९, २०८१ बागेश्वरी पोस्ट

कोहलपुर । कोहलपुर नगरपालिका-१ मा रहेको कृष्ण माध्यमिक विद्यालयमा १८ लाखको भिम-कमला अक्षयकोष-२०८१ स्थापना भएको छ । स्व. भिम बहादुर मल्ल ठकुरीको स्मरणमा उनको धर्मपत्नी कमलादेवी मल्लले १८ लाखको भिम-कमला छात्रबृत्ति अक्षयकोष-२०८१ स्थापना गरेकी हुन् ।

अक्षयकोष स्थापना कार्यक्रम विद्यालय व्यवस्थापन समितिका अध्यक्ष अमर बहादुर चन्दको सभापतित्व एवम् लुम्बिनी प्रदेशसभा सदस्य दुर्गा प्रसाद चौधरीको प्रमुख आतिथ्यतामा भएको थियो । यो अक्षयकोष विशेषतः कक्षागत रुपमा उत्कृष्ट विद्यार्थी, अनाथ, गरीब तथा विपन्न, जेहेन्दार, द्वन्दपीडित र दैलेख जिल्लाबाट अध्ययन गर्न आउने जेहेन्दार विद्यार्थी मध्येबाट छनौटका आधारमा प्रति बर्ष पुरस्कृत गर्ने र विद्यार्थीहरूलाई उच्च शिक्षा प्राप्त गर्न सहयोग पु¥याउने उद्देश्यले स्थापना गरिएको हो । विद्यालयले भिम-कमला छात्रवृत्ति अक्षय कोष परिचालन निर्देशिका २०८१ र अक्षय कोष सञ्चालन सम्बन्धि ९ बुँदामा सम्झौता समेत गरेको छ ।

सम्झौतामा भए अनुसार वार्षिकरुपमा प्राप्त हुने व्याज रकमलाई प्रत्येक वर्ष बालविकासदेखि कक्षा १२ सम्म कक्षागतरुपमा प्रथम हुने विद्यार्थीहरु १३ जना, अनाथ, गरीब तथा विपन्न, जेहेन्दार र द्वन्दपीडित १० जना र दैलेख जिल्लाबाट अध्ययन गर्न आउने जेहेन्दार विद्यार्थी ५ जना गरी २८ जना विद्यार्थीहरुलाई मूल्याङ्कन छनौट तथा सिफारिस समितिको निर्णय बमोजिम छात्रवृत्ति वितरण गर्ने र अक्षय कोषको नाम परिवर्तन गर्न तथा अन्य कुनै कोष वा शिर्षकमा समायोजन नपाइने समेत उल्लेख गरेको छ । विद्यालयका प्रधानाध्यापक दिलिप वली (पहिलो पक्ष) र अक्षय कोषदाता कमलादेवी मल्ल (दोस्रो पक्ष) रहेको र साक्षीहरु उत्तर अधिकारी, प्रेम कुमारी शाही, खगेन्द्र बहादुर शाही र विद्यालय व्यवस्थापन समितिका अध्यक्ष अमर बहादुर चन्द रहेका छन् भने कोहलपुर नगरपालिका वडा नम्बर १ का वडा अध्यक्ष बद्री प्रसाद जैसी र नगर शिक्षा शाखा प्रमुख राम बहादुर हमालको रोहवरमा सम्झौता गरिएको छ ।

अक्षय कोष स्थापना कार्यक्रमका प्रमुख अतिथि तथा लुम्बिनी प्रदेशसभा सदस्य चौधरीले सामुदायिक विद्यालयलाई गुणस्तरीय र प्रभावकारी बनाउन शिक्षक, विद्यार्थी र अभिभावकबीच त्रिकोणात्मक सम्बन्ध बलियो हुनुपर्ने बताए । अक्षय कोषले विद्यार्थीहरूलाई उच्च शिक्षा हासिल गर्न मद्दत पु¥याउने मात्र नभई उनीहरूको भविष्य उज्यालो बनाउनका लागि पनि महत्वपूर्ण भूमिका खेल्ने बताए । कोहलपुर नगरपालिकाका कार्यवाहक नगर प्रमुख विरेन्द्र कुमार शाहले भिम-कमला अक्षयकोषको स्थापनाले नगरको शिक्षा क्षेत्रलाई ठूलो सहयोग पु¥याउने उल्लेख गरे । ‘नगरपालिकामा यस्तो उत्कृष्ट प्रयासले शिक्षा क्षेत्रको स्तर उकास्न महत्वपूर्ण भूमिका खेल्नेछ’ उनले भने, ‘नगरका अन्य स्थानहरूमा पनि यस्ता कोषहरू स्थापना गर्न प्रोत्साहन गरिनु आवश्यक छ ।’ जसले गर्दा विद्यार्थीहरूलाई शिक्षा प्राप्त गर्न आर्थिक कठिनाईको सामना गर्न नपर्ने शाहको भनाई थियो ।

कार्यक्रममा नेकपा माओवादी (केन्द्र) कोहलपुर नगर अध्यक्ष अवराज खड्का र नेकपा (एस) का नगर अध्यक्ष शिव डाँगीले अक्षय कोष स्थापनाले शिक्षामा उर्जा थप भएको बताए । अक्षयकोषदाता कमलादेवीले स्व. श्रीमान भिम बहादुर मल्ल ठकुरीको बारेमा चर्चा गर्दै शिक्षा र समाजप्रतिको लगावबारे चर्चा गरेकी थिइन् । विद्यालयका सहायक प्रधानाध्यापक विरेन्द्र कुमार मल्लले कार्यक्रम सञ्चालन गरेका थिए ।

प्रकाशित मिति: मंगलबार, साउन २९, २०८१ २०:४१

प्रतिक्रिया दिनुहोस्