क्यानडासँग नेपालको पहिलो हार

खेलकुद

गृहपृष्ठ
खेलकुद
क्यानडासँग नेपालको पहिलो हार

क्यानडासँग नेपालको पहिलो हार

मंगलबार, असोज १, २०८१ बागेश्वरी पोस्ट

नेपालगन्ज । आइसीसी विश्वकप लिग–२ त्रिकोणात्मक ओडीआई सिरिजको पहिलो खेलमा नेपाल क्यानडासँग १ सय ३ रनले पराजित भएको छ ।

सोमबार क्यानाडाको किङ सिटीमा भएको खेलमा खराब ब्याटिङ गरेको नेपाल एक सय ३ रनको फराकिलो अन्तरले पराजित भयो । २ सय ५४ रनको लक्ष्य पछ्याएको नेपालले ४०.१ ओभरमा अल आउट हुँदा मात्र एक सय ५० रन बनाउन सक्यो ।

क्यानडाविरुद्ध कुनै पनि खेलाडीले ठूलो स्कोर बनाउन सकेनन् । माथिल्लो क्रमका कुनै पनि खेलाडीले प्रदर्शन राम्रो गर्न सकेनन् । करण केसीले सर्वाधिक २७, सन्दीपले २२ र आरिफ शेखले २० रन बनाए । कप्तान रोहितकुमार पौडेल, ओपनर कुशल भुर्तेल र दीपेन्द्रसिंह ऐरीले दोहोरो अंकमा रन बनाउन सकेनन् ।तल्लो क्रमका सन्दीप लामिछाने र गुल्शन झाले सर्वाधिक ४० बलमा ४० रनको साझेदारी गरे ।

क्यानडाका डिलोन हेलिगरले सर्वाधिक पाँच विकेट हात पारेका थिए । अखिल कुमार र अन्स पटेलले समान दुई विकेट हात पारे । यसअघि टस हारेर सुस्त सुरुआत गरेको क्यानडाले पछि उत्कृष्ट प्रदर्शन गर्यो । पाँचौं नम्बरमा आएका कप्तान निकोलास किर्टनले सर्वाधिक ७३ रन बनाए । ओपनर नभनीत ढलिवालले ४८ रन जोडे ।

नेपालका सोमपाल कामी र ललितनारायण राजवंशीले समान दुई विकेट लिए । यो खेलसँगै नेपाल तालिकाको सातौं स्थानमा छ । पाँच खेल खेलेको नेपालले एक जित, चार हारसँगै दुई अंक छ । क्यानडा भने यो जितले दोस्रो स्थानमा उक्लिएको छ । ९ मध्ये पाँच खेल जितेको क्यानडाको १० अंक छ ।

प्रकाशित मिति: मंगलबार, असोज १, २०८१ ०९:४३

प्रतिक्रिया दिनुहोस्