अमेरिकामाथि नेपालको जित

खेलकुद

गृहपृष्ठ
खेलकुद
अमेरिकामाथि नेपालको जित

अमेरिकामाथि नेपालको जित

शुक्रबार, कात्तिक २, २०८१ बागेश्वरी पोस्ट

नेपालगञ्ज । नेपाली राष्ट्रिय क्रिकेट टिमले अमेरिकामा विजयी शुरुवात गरेको छ । टी-२० सिरिजको पहिलो खेलमा नेपालले अमेरिकालाई १७ रनले पराजित गर्दै सिरिजमा विजयी शुरुवात गरेको छ ।

जितका लागि एक सय ६५ रनको लक्ष्य पछ्याएको अमेरिका निर्धारित २० ओभरमा सात विकेटको क्षतिमा एक सय ४७ रनमा समेटिएको थियो ।

अमेरिकाका लागि शयन जहानगिरले सर्वाधिक अविजित ६० रन बनाए । यस्तै आन्द्रेस गौस ३०, मिलिन्ड कुमार २२ र जसदीप सिंहले १६ रन बनाए ।

बलिङमा नेपालका दीपेन्द्रसिंह ऐरीले तीन विकेट लिए । रिजन ढकाल, करण केसी र गुलशन झाले एक-एक विकेट लिए ।

यसअघि पहिले ब्याटिङ गरेको नेपालले निर्धारित २० ओभरमा नौ विकेटको क्षतिमा एक सय ६४ रन बनाएको थियो । नेपालका लागि कप्तान रोहित कुमार पौलेलले अविजित ४९ रन बनाए ।

यस्तै दीपेन्द्रसिंह ऐरीले २८, ओपनरद्वय अनिल शाह र आशिफ शेखले २७/२७ तथा गुलशन झाले ११ र कुशल भुर्तेलले १० रन बनाए ।

बलिङमा अमेरिकाका जसदिप सिंह, सौरभ नेत्राभाल्कर र हर्मित सिंहले दुई-दुई विकेट लिए । नोस्तुश केन्जिके र अलि खानले एक एक विकेट झारे ।

आइसिसी एक दिवसीय विश्वकप लिग–२ सिरिज खेल्न अमेरिका पुगेको नेपाली टोलीले सिरिज अघि अमेरिकासँग तीन खेलको टी–२० क्रिकेट खेलेको हो । टी–२० सिरिजको दोस्रो खेल आइतबार र तेस्रो खेल सोमबार हुनेछ ।

टी–२० सिरिजपछि आइसिसी एक दिवसीय विश्वकप लिग–२ कात्तिक ९ देखि १९ गतेसम्म हुनेछ । एक दिवसीय त्रिकोणात्मक सिरिजमा आयोजक अमेरिका, नेपाल र स्कटल्यान्ड छ ।

प्रकाशित मिति: शुक्रबार, कात्तिक २, २०८१ ०९:४९

प्रतिक्रिया दिनुहोस्