भेरी अस्पतालको आन्तरिक पूँजी निर्माणमा मेरो ध्यान केन्द्रित छः डा.सुवेदी

स्वास्थ्य

गृहपृष्ठ
स्वास्थ्य
भेरी अस्पतालको आन्तरिक पूँजी निर्माणमा मेरो ध्यान केन्द्रित छः डा.सुवेदी

भेरी अस्पतालको आन्तरिक पूँजी निर्माणमा मेरो ध्यान केन्द्रित छः डा.सुवेदी

बुधबार, कात्तिक १४, २०८१ बागेश्वरी पोस्ट

नेपालगञ्ज । भेरी अस्पतालका प्रमुख मेडिकल सुपरिटेण्डेण्ट डा. निराजन सुवेदीले अस्पतालको आन्तरिक पूँजी निर्माणमा आफ्नो ध्यान केन्द्रित रहेको बताएका छन् । पूँजी निर्माणका लागि आफूले सक्दो कोशिस गर्ने उनको भनाई छ । कार्यभार सम्हालेको एक महिनापछि पत्रकारहरुसंग भेटघाट गरेका डा. सुवेदीले एमडी/एमएस अध्ययनका लागि चिकित्सा विज्ञान राष्ट्रिय प्रतिष्ठान (न्याम्स) संग सम्झौता भइसकेकाले छिट्टै कार्यान्वयन चरणमा जाने बताए । योसंगै अब यहाँका कन्सल्टेन्ट चिकित्सकहरुले न्याम्सबाट एकेडेमिक उपाधि पाउने डा. सुवेदीले बताए । उनले अस्पतालको फार्मेसीमा बीमाले तोकेका औषधि नपाउने गरेको गुनासो बढिरहेको भन्दै त्यसलाई सहज बनाउन तिहार लगत्तै नयाँ टेण्डर आह्वान गर्ने जानकारी दिए । सिटी स्क्यानका लागि अन्यत्रै रिफर गर्नुपर्ने अवस्था रहेको भन्दै उनले दिर्घकालीनरुपमा अस्पतालको क्षमता बढाउन आफ्नो कोशिस रहने बताए । उनले अस्पताललाई भरोसाको केन्द्र बनाउन आफूले कोशिस गरिरहेको बताए ।

राम्रो सेवा दिएपछि सेवाग्राही आफैैं आउँछन् भन्ने मान्यताका आधारमा काम गरिरहेको उनको भनाई छ । अस्पतालमा भइरहेको चुहावट पनि एक मुख्य समस्या रहेको भन्दै मेडिकल सुपरिटेण्डेण्ट डा. सुवेदीले त्यसमा पनि काम गर्ने बताए । करीब २२ करोड भुक्तानी गर्नुपर्ने दायित्व रहेको बताउँदै त्यसका लागि आन्तरिक स्रोत बृद्धि गर्नुको विकल्प नरहेको उनको भनाई छ । उनले नयाँ अपरेशन थियटर (ओटी) अझै सञ्चालन गर्न नसकिएको बताए । ड्रेनेज व्यवस्थापन, अक्सिजन लिकेज, उपयुक्त ढोकाको प्रबन्ध लगायतको समस्या हल गरेपछि मात्र नयाँ ओटी सञ्चालन गर्न सकिने जानकारी दिए । सिकलसेलका विरामीका लागि डेडिकेटेड वार्ड सञ्चालन गर्नुपर्ने आवश्यकता पनि उनले औंल्याए । डा. सुवेदीले भेरीलाई राम्रो बनाउन स्थानीय नागरिक समाज र मिडिया पैरवीको ठूलो भूमिका हुने भएकाले सहयोग गर्न आग्रह गरे ।

अस्पताल विकास समितिका अध्यक्ष विरेन्द्र बहादुर शाहले सेवा सुधारका लागि आफू आएदेखि नै पर्यत्न गरिरहेको बताए । उनले अस्पतालको आर्थिक सुधारको पाटो आवश्यक रहेको बताए । शाहले संघीय अस्पताल भएकाले संघीय सरकारले पनि सहयोग गर्न आवश्यक रहेकोमा जोड दिए । पूर्वाधार र उपकरणमा संघीय सरकारले सहयोग गर्ने र अन्य कामहरु अस्पताल विकास समितिले गर्न सक्ने भएकाले अस्पताललाई बिरामीको भरोसाको केन्द्र बनाउन सकिने उल्लेख गरे ।

त्यस अवसरमा उपस्थित भएका स्वास्थ्य तथा जनसंख्या मन्त्रालयका प्रबक्ता डा. प्रकाश बुढाथोकीले संघीय अस्पतालहरुमा डिजिटल डिस्प्ले राख्ने तयारी गरेको बताए । उनले अस्पतालमा बेडहरुको अवस्था, उपलब्धता, अक्पुपेन्सीबारे सर्वसाधारणलाई सहजरुपले जानकारी दिन अस्पतालको बाहिरै डिजिटल ड्यासबोर्ड र डिस्प्ले राख्ने तयारीमा लागेको जानकारी दिए ।

प्रबक्ता डा. बुढाथोकीले देशभरका अस्पतालहरुमा जनशक्तिको अभाव भएको जानकारी गराउँदै चार जना डाक्टरले हेर्नुपर्ने विरामी एक जनाले मात्रै हेरिरहेको अवस्था रहेको बताए । उनले अस्पतालहरुमा सिस्टम बसाउन लागिरहेको बताउँदै सहज, गुणस्तरीय र सर्वसुलभ सेवाका लागि मन्त्रालय प्रतिबद्ध रहेको बताए ।

कार्यक्रममा अस्पताल विकास समितिका सदस्य डक्टप्रसाद धितालको पनि उपस्थिति रहेको थियो ।

प्रकाशित मिति: बुधबार, कात्तिक १४, २०८१ १८:५६

प्रतिक्रिया दिनुहोस्