जय किसान फाइनलमा

खेलकुद

गृहपृष्ठ
खेलकुद
जय किसान फाइनलमा

जय किसान फाइनलमा

शनिबार, असोज ३१, २०८३ बागेश्वरी पोस्ट

नेपालगन्ज : बाँकेको खजुरामा जारी बाँके जिल्ला स्तरीय फुटबल प्रतियोगितामा ब्रोदर्स एफसीलाई पराजित गर्दै जय किसान स्पोर्ट्स क्लब फाइनलमा प्रवेश गरेको छ ।

शनिबार सम्पन्न पहिलो सेमिफाइनल खेलमा निर्धारित समयमा दुवै टोलीबाट गोल हुन नसकेपछि खेलको निर्णय ट्राइब्रेकरबाट गरिएको थियो । ट्राइब्रेकरमा जय किसानले ब्रोदर्स एफसीलाई ५–३ गोलले पराजित गर्दै फाइनलमा स्थान सुरक्षित गरेको हो ।

प्रतियोगिता अन्तर्गत आइतबार हुने दोस्रो सेमिफाइनलमा आयोजक न्यू डाँफे स्पोर्ट्स क्लब र अप्सरा एफसीबीच प्रतिस्पर्धा हुनेछ । उक्त खेलको विजेताले उपाधिका लागि जय किसानसँग प्रतिस्पर्धा गर्नेछ ।

प्रतियोगिताको विजेता टोलीले नगद ५१ हजार १११ रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेता टोलीले नगद ३१ हजार १११ रुपैयाँसहित ट्रफी, मेडल र प्रमाणपत्र पाउने आयोजकले जनाएको छ ।

प्रतियोगितामा नेपालगन्ज न्यूरो हस्पिटलले मुख्य प्रायोजकका रूपमा सहकार्य गरेको क्लबका अध्यक्ष बालराम खत्रीले जानकारी दिए । त्यसैगरी, क्लबका संरक्षक तथा खजुरा गाउँपालिका–४, डी गाउँ निवासी हाल अमेरिकामा रहेका समाजसेवी लिलबहादुर थापाले प्रतियोगिताको पुरस्कार राशी सौजन्य गरेका हुन् ।

न्यू डाँफे स्पोर्ट्स क्लबका सचिव तेजेन्द्र योगीका अनुसार प्रतियोगितामा १५ टोलीको सहभागिता रहेको छ । दसैँ र तिहारको अवसर पारेर आयोजना गरिएको प्रतियोगिता कात्तिक २ गतेसम्म सञ्चालन हुनेछ । क्लबका उपाध्यक्ष दानबहादुर गुरुङले प्रतियोगिता आइतबारदेखि सुरु गरिएको जानकारी दिए ।

प्रतियोगिताको फाइनल खेलको दिन साँझ सांस्कृतिक कार्यक्रम समेत आयोजना गरिने आयोजकले जनाएको छ । क्लबका अध्यक्ष खत्रीका अनुसार ‘दसैँ उत्सव’ नाम दिइएको सांस्कृतिक कार्यक्रमसँगै प्रतियोगिताको समापन गरिनेछ ।

प्रकाशित मिति: शनिबार, असोज ३१, २०८३ २१:२२

प्रतिक्रिया दिनुहोस्