न्यू दर्पण र ब्रदर्स एफसी विजयी

खेलकुद

गृहपृष्ठ
खेलकुद
न्यू दर्पण र ब्रदर्स एफसी विजयी

न्यू दर्पण र ब्रदर्स एफसी विजयी

बिहीबार, असोज २९, २०८३ बागेश्वरी पोस्ट

नेपालगन्ज । बाँकेको खजुरास्थित मिनी रंगशालामा जारी जिल्ला स्तरीय फुटबल प्रतियोगिता २०८३ अन्तर्गत बिहीबार सम्पन्न खेलमा न्यू दर्पण युवा स्पोर्ट्स क्लब ई गाउँ र ब्रदर्स एफसी डि गाउँ विजयी भएका छन् ।

पहिलो खेलमा न्यू दर्पणले आयोजक न्यू डाँफे स्पोर्ट्स क्लबको ए टिमलाई २–० गोलले पराजित गरेको हो । न्यू दर्पणका तर्फबाट जर्सी नम्बर १० का विनोद चन्द र जर्सी नम्बर ७ का विमल बस्नेतले एक–एक गोल गरे । खेलमा उत्कृष्ट प्रदर्शन गरेका विनोद चन्द म्यान अफ द म्याच घोषित भए । उनले खजुरा मार्टको सौजन्यमा नगद पुरस्कार र मायाको चिनो प्राप्त गरे ।

यस्तै, बिहीबारकै दोस्रो खेलमा ब्रदर्स एफसी डि गाउँले न्यू हिमालय स्पोर्ट्स क्लबलाई पराजित गर्दै प्रतियोगिताको सेमिफाइनलमा स्थान सुरक्षित गरेको छ । ब्रदर्स एफसीका तर्फबाट जर्सी नम्बर १७ का विपिन सिजाली र जर्सी नम्बर १० का सञ्जीव शाहीले एक–एक गोलको योगदान दिए ।

प्रतियोगिता अन्तर्गत शुक्रबार पनि दुई खेल हुने आयोजकले जनाएको छ । पहिलो खेलमा अप्सरा एफसी र न्यू भद्रकाली स्पोर्ट्स क्लबबीच प्रतिस्पर्धा हुनेछ भने दोस्रो खेलमा जय किसान स्पोर्ट्स क्लब र न्यू दर्पण युवा स्पोर्ट्स क्लब आमनेसामने हुनेछन् ।

न्यू डाँफे स्पोर्ट्स क्लबको आयोजनामा असोज २५ गतेदेखि सुरु भएको प्रतियोगिता कात्तिक २ गतेसम्म सञ्चालन हुनेछ । प्रतियोगिताको विजेता टोलीले नगद ५१ हजार १११ रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेता टोलीले नगद ३१ हजार १११ रुपैयाँसहित ट्रफी, मेडल र प्रमाणपत्र पाउनेछ ।

प्रतियोगितामा नेपालगन्ज न्युरो हस्पिटलले मुख्य प्रायोजकका रूपमा सहकार्य गरेको क्लबका अध्यक्ष बालराम खत्रीले जानकारी दिए । प्रतियोगिताको पुरस्कार राशी क्लबका संरक्षक तथा खजुरा गाउँपालिका–४, डि गाउँ निवासी हाल अमेरिकामा रहेका समाजसेवी लीलबहादुर थापाले सौजन्य गरेका हुन् ।

प्रतियोगितामा १५ टोलीको सहभागिता रहेको क्लबका सचिव तेजेन्द्र योगीले जानकारी दिए ।

प्रकाशित मिति: बिहीबार, असोज २९, २०८३ २०:००

प्रतिक्रिया दिनुहोस्