बागेश्वरी मिनी म्याराथनमा अरविन्द र गिता प्रथम

खेलकुद

गृहपृष्ठ
खेलकुद
बागेश्वरी मिनी म्याराथनमा अरविन्द र गिता प्रथम

बागेश्वरी मिनी म्याराथनमा अरविन्द र गिता प्रथम

शनिबार, मंसिर १, २०८१ बागेश्वरी पोस्ट

नेपालगञ्ज । बागेश्वरी मिनी म्याराथनमा छात्रतर्फ महेन्द्र मावि नरैनापुरका अरविन्द यादव र छात्रातर्फ महेन्द्र माविकै गिता साहु प्रथम भएका छन् ।

नेपालगञ्जमा आज सम्पन्न मिनी म्याराथनमा यादवले १८ मिनेट ३९ सेकेण्डमा दौड पूरा गरेका थिए । उक्त विधामा जनता नमुना मावि सन्तकोटी खजुराका विजय खड्का दोश्रो र ज्ञानोदय नमुना मावि खजुराका खगेन्द्र भण्डारी तेश्रो भएका छन् । यसैगरी छात्रातर्फ प्रथम भएकी साहुले २८ मिनेट १ सेकेन्डमा दौड पूरा गरेका थिए । छात्रातर्फ नेपालगञ्ज मोडेल एकेडेमी कारकाँदोकी धिरजा विष्ट दोश्रो र सोही विद्यालयकी आरुषी भट्टराई तेश्रो भएका छन् ।

प्रथम, द्वितीय र तृतीय हुनेलाई क्रमशः १० हजार, ७ हजार र ५ हजार पुरस्कार प्रदान गरिएको छ । यसका साथै प्रथम, द्वितीय र तृतीय हुनेलाई प्लेटिनियम म्यानेजमेन्ट कलेजमा क्रमशः २ लाख ५० हजार, २ लाख र १ लाख ५० हजारको छात्रबृत्ति समेत उपलब्ध गराइएको छ । यस्तै रन फर फनमा भने योगेन्द्र बुढाथोकी प्रथम भएका छन् । अलि अहमद दोश्रो तथा विनोद बर्मा तेश्रो भएका छन् । म्याराथनमा बाँकेका २६ विद्यालयका १ सय १२ विद्यार्थी सहभागी भएका थिए ।

रेडियो बागेश्वरीले आफ्नो २१औं वर्षको सुरुवातलाई स्मरणीय बनाउन 'हरियो विकल्प, उज्यालो भोली' अर्थात ‘ग्रीनर च्वाइस ब्राइटर टुमारो’ भन्ने नाराका साथ म्याराथन सम्पन्न गरेको हो । मिनी म्याराथनका विजेतालाई रेडियोका कार्यकारी प्रमुख सिद्धार्थ पाण्डेले पुरस्कार प्रदान गरेका थिए । लुम्बिनी प्रदेशका आन्तरिक मामिला तथा कानुन मन्त्री आदेशकुमार अग्रवालले म्याराथन प्रतियोगिताको उद्घाटन गरेका थिए । उनले विद्यार्थीहरुको बृत्ति विकासमा टेवा पुर्याउने बताएको थिए । मिनी म्याराथन प्रतियोगिताको उद्घाटन गर्दै मन्त्री अग्रवालले समय-समयमा म्याराथन आयोजना गरिरहनुपर्नेमा जोड दिए ।

म्याराथन बिहान ७ः३० बजे नेपालगञ्ज–१० आदर्शनगर पेट्रोल पम्पबाट सुरु भएर बीपी चौक, धम्बोझी, सेतु विक चौक, त्रिभुवन चौक, हुलाक कार्यालय र शीतलनगर हुँदै पुनः पेट्रोल पम्पमा आएर समापन भएको थियो । समापन पश्चात् प्रत्येकलाई विरुवा समेत वितरण गरिएको थियो ।

लुम्बिनी, कर्णाली र सुदूरपश्चिम प्रदेशको पर्यटन प्रवद्र्धनका लागि रेडियो बागेश्वरीले केही दिनभित्रै “बागेश्वरी समिट“ कार्यक्रम पनि आयोजना गर्दैछ । जसमा तीन वटै प्रदेशका विशिष्ट व्यक्तित्वहरूको सहभागिता रहनेछ ।

प्रकाशित मिति: शनिबार, मंसिर १, २०८१ २०:१५

प्रतिक्रिया दिनुहोस्