सुनको मूल्य एकै दिन तोलामै १५ हजार ९०० ले घट्यो

अर्थ

गृहपृष्ठ
अर्थ
सुनको मूल्य एकै दिन तोलामै १५ हजार ९०० ले घट्यो

सुनको मूल्य एकै दिन तोलामै १५ हजार ९०० ले घट्यो

सोमबार, मंसिर १०, २०८१ बागेश्वरी पोस्ट

नेपालगन्ज । सरकारले सुनको मूल्यमा लाग्दै आएको भन्सार महसुल दर घटाएपछि नेपाली बजारमा सुनको मूल्य एकै दिन प्रतितोला १५ हजार ९०० रुपैयाँले घटेको छ ।

नेपाल सुनचाँदी व्यवसायी महासंघका अनुसार आइतवार प्रतितोला १ लाख ६७ हजार २०० रुपैयाँमा कारोबार भएको सुन आज (सोमवार) का लागि १ लाख ५१ हजार ३०० कायम भएको हो ।

हालैको मन्त्रिपरिषद् बैठकले स्वीकृति दिएपछि अर्थ मन्त्रालयले सुन आयातमा लाग्ने भन्सार महशुल दर २० प्रतिशतबाट १० प्रतिशतमा झार्ने निर्णय गरेको थियो । चाँदी आयातमा भन्सार दर १५ प्रतिशत रहेकोमा १० प्रतिशतमा झारिएको छ, जसको प्रभाव सुनको मूल्यमा परेको हो ।

आज अन्तरराष्ट्रिय बजारमा समेत सुनको मूल्य घटेको छ । आज अन्तरराष्ट्रिय बजारमा सुनको मूल्य प्रतिऔंस २ हजार ६७१ दशमलव ५७ अमेरिकी डलरमा कारोबार भइरहेको छ । यो मूल्य गत कारोबार अन्तिम कारोबार मूल्यभन्दा ४४ दशमलव ७६ अमेरिकी डलरले कमी हो ।भन्सार दर घटाएर सुनको मूल्य समायोजन गर्नु सरकारको स्वागतयोग्य कदम रहेको व्यवसायीले बताएका छन् । विगतमा समान रहेको सुनको भन्सार महशुल भारतमा ६ प्रतिशत हुँदा नेपालमा २० प्रतिशत पुग्नु असान्दर्भिक थियो । महशुल वृद्धि सुनचाँदी बजारमा चाडपर्व बाहेकको समयमा ठूलो असर पारेकोमा भन्सार दर समायोजनले अब सुनचाँदी व्यवसायलाई ठूलो राहत पुग्ने व्यवसायीको भनाई छ ।

प्रकाशित मिति: सोमबार, मंसिर १०, २०८१ १४:२६