सातौं मेयर कप राष्ट्रिय साइकल दौडको उपाधि राना मगरलाई

खेलकुद

गृहपृष्ठ
खेलकुद
सातौं मेयर कप राष्ट्रिय साइकल दौडको उपाधि राना मगरलाई

सातौं मेयर कप राष्ट्रिय साइकल दौडको उपाधि राना मगरलाई

शनिबार, पुस ६, २०८१ बागेश्वरी पोस्ट

नेपालगन्ज । नेपालगन्जमा आयोजना गरिएको सातौं मेयर कप राष्ट्रिय साइकल दौड प्रतियोगिताको उपाधि सुरज राना मगरले जितेका छन् ।

३५ किलोमिटरको एमटीबी पुरुष खुल्ला साइकल दौड प्रतियोगितामा एपीएफमा आवद्ध राष्ट्रिय खेलाडी राना मगरले एपीएफकै अच्यूतकृष्ण खरेललाई पछि पार्दै ५० हजार राशीको उपाधि जितेका हुन् । द्वितिय भएका खरेलले २५ हजार पुरस्कार पाएका छन् । जंगु थारु तृतिय हुँदा १५ हजार पुरस्कार पाए ।

२५ किलोमिटरको एमटीबी मास्टरमा हर्कबहादुर लामा प्रथम भएका छन् । बाँकेका देव बोहरा द्वितिय र दीपक मल्ल तृतिय भए । उनीहरुले क्रमशः २० हजार, १५ हजार र १० हजार पुरस्कार पाएका छन् ।

१६ किलोमिटरको एमटीबी स्कूल लेभलमा डेल्सन बोहरा प्रथम, अनमोल गुप्ता द्वितिय र रन्जित चौहान तृतिय भएका छन् । २२ किलोमिटरको साधारण साइकल पुरुषमा विनोद यादव प्रथम, लिखनप्रसाद चौधरी द्वितिय र जगतराम यादव तृतिय भएका छन् । १६ किलोमिटरको साधारण साइकल दौड महिलातर्फ रुपा थारु प्रथम, समिता थारु द्वितीय र मिना कुमारी थारु तृतिय भए । यी तीन वटै विधाका विजयी प्रतियोगीलाई क्रमशः १०, ७ र ५ हजार रुपैयाँ पुरस्कार प्राप्त गरेका छन् ।

नेपालगन्ज साइक्लिङ क्लबको आयोजनामा सम्पन्न प्रतियोगिताका विजेतालाई नेपालगन्ज उपमहानगरपालिका वडा नम्बर १२ का अध्यक्ष तरुण कुमार बज्राचार्य, नेपाली सेनाका प्रमुख सेनानी दीपक गुरुङ, नेपालगन्ज साइक्लिङ क्लबका अध्यक्ष प्रदिप सापकोटा लगायतले पुरस्कार वितरण गरेका थिए । प्रतियोगिताको उद्घाटन नगर प्रमुख प्रशान्त विष्टले गरेका थिए । यो प्रतियोगिता वि.सं. २०७५ सालदेखि हुँदै आएको छ ।

प्रकाशित मिति: शनिबार, पुस ६, २०८१ २२:१९

प्रतिक्रिया दिनुहोस्