मेयर कप पुरुष फुटबल प्रतियोगिता माघमा हुने

खेलकुद

गृहपृष्ठ
खेलकुद
मेयर कप पुरुष फुटबल प्रतियोगिता माघमा हुने

मेयर कप पुरुष फुटबल प्रतियोगिता माघमा हुने

बुधबार, पुस १०, २०८१ बागेश्वरी पोस्ट

नेपालगञ्ज । बाँके जिल्ला फुटबल संघको आयोजनामा हुने मेयर कप पुरुष फुटबल प्रतियोगिता माघ महिनामा हुने भएको छ । नेपालगञ्ज रंगशालामा आयोजना गरिने प्रतियोगिता माघ ५ गतेदेखि आयोजना गर्ने निर्णय भएको आयोजक बाँके जिल्ला फुटबल संघले जनाएको छ ।

बाँके जिल्ला फुटबल संघका अध्यक्ष एवम् अखिल नेपाल फुटबल संघका केन्द्रिय सदस्य भोजराज शाहीको अध्यक्षतामा बसेको बैठकले माघ महिनामा जिल्ला स्तरीय मेयर कप फुटबल प्रतियोगिता गर्ने निर्णय गरेको हो । प्रतियोगिताको तयारी सुरु भइसकेको अध्यक्ष शाहीले बताए । यस पटक महिला र पुरुष मेयर कप फुटबल प्रतियोगिता छुट्टाछुट्टै मितिमा आयोजना गर्न लागिएको उनले बताए । मेयर कप बाँके जिल्ला फुटबल संघले दुई दशकदेखि आयोजना गर्दै आएको प्रतियोगिता हो । मेयर कप फुटबलमा बाँके जिल्लाका ८ स्थानीय तहका निजी तथा सामुदायिक विद्यालयहरुको सहभागिता हुने गरेको छ ।

विद्यालय स्तरको प्रतियोगिताले नयाँ खेलाडीलाई अवसर प्रदान गर्ने अध्यक्ष शाहीले बताए । मेयर कप फुटबल प्रतियोगितामा उत्कृष्ट खेलाडी छनोट गरेर अन्य जिल्लासँग मैत्रीपूर्ण खेल खेल्ने संघको योजना रहेको छ । गत वर्ष बाँके जिल्लामा भएको मेयर कपको उत्कृष्ट खेलाडीहरुले कैलालीसँग मैत्रीपूर्ण खेल खेलेको थियो । मेयर कप फुटबल प्रतियोगितामा करिब ५० विद्यालयको सहभागिता रहने संघले अनुमान गरेको अध्यक्ष शाहीले बताए ।

प्रकाशित मिति: बुधबार, पुस १०, २०८१ १९:४५