लुम्बिनी कप महिला फुटबलको सचिवालय उद्घाटन

खेलकुद

गृहपृष्ठ
खेलकुद
लुम्बिनी कप महिला फुटबलको सचिवालय उद्घाटन

लुम्बिनी कप महिला फुटबलको सचिवालय उद्घाटन

बिहीबार, पुस ११, २०८१ बागेश्वरी पोस्ट

नेपालगञ्ज । लुम्बिनी कप महिला फुटबल प्रतियोगिताको सचिवालय उद्घाटन गरिएको छ । आज नेपालगञ्ज उपमहानगरपालिकाका नगर प्रमुख प्रशान्त विष्टले नेपालगञ्ज रंगशालामा रहेको सचिवालयको उद्घाटन गरेका हुन् । अन्तरालको आयोजना र बाँके जिल्ला फुटबल संघको सहकार्यमा आगामी फागुन १९ गतेदेखि २९ गतेसम्म नेपालगञ्ज रंगशालामा लुम्बिनी कप महिला फुटबल प्रतियोगिता हुँदैछ ।

नगर प्रमुख विष्टले लुम्बिनी कप महिला फुटबलले नेपालगन्जलाई फेरि राष्ट्रिय स्तरमा चिनिने अवसर प्रदान गर्ने बताए । उनले भने, ‘नेपालगञ्जले देशभरमा खेलकुद क्षेत्रमा आफ्नो पहिचान बनाएको छ । नेपालगञ्ज खेलकुदको हब हो । तर, पछिल्लो समय खेलकुदको स्तर घटेको अनुभव भएको छ । यो प्रतियोगिताले नेपालगञ्जलाई चिनाउने अवसर पनि हो । हामीसँग भएको स्रोतसाधनको प्रयोग गरेर उत्कृष्ट नतिजा निकाल्ने प्रयास गर्नुपर्छ । खेलाडीमाथि राज्यले लगानी गर्नुपर्छ । खेलाडीको सम्मान गर्ने वातावरण बन्नुपर्छ ।’

नेपालगञ्ज रंगशालामा हुने लुम्बिनी कप महिला फुटबलमा नेपाल र छिमेकी मित्र राष्ट्र भारतका ८ टिम सहभागी हुनेछन् ।
उद्घाटन समारोहमा बाँके जिल्ला फुटबल संघका अध्यक्ष एवम् एन्फा केन्द्रिय सदस्य भोजराज शाहीले लुम्बिनी कप फुटबलले यस क्षेत्रको महिला फुटबलको विकासमा महत्वपूर्ण भुमिका निर्वाह गर्ने बताए । उनले भने, 'कोभिडपछि नेपालगञ्जले राष्ट्रिय स्तरको प्रतियोगिता गर्न सकेको थिएन । तर, यो प्रतियोगिताबाट नेपालगञ्जमा फुटबल गतिविधि बढेको छ । प्रतियोगितालाई सफल बनाउन संघको सम्पूर्ण टिम खटिनेछ ।’ प्रतियोगिताले बाँके र यस क्षेत्रमै नयाँ प्रतिभाहरु आउने विश्वास व्यक्त गर्दै अध्यक्ष शाहीले बाँके जिल्ला फुटबल संघ लुम्बिनी कपलाई सफल पार्न जुटिसकेको बताए ।

आयोजक अन्तरालका प्रमुख कार्यकारी जयनारायण शाहले पश्चिम नेपालमा महत्वपूर्ण प्रतियोगिताको सुरुवात गर्न लागेको बताए । उनले भने, ‘यो प्रतियोगिता यस क्षेत्रलाई चिनाउने प्रतियोगिता हो । लुम्बिनी कप महिला फुटबल सफल बनाउन म सम्पूर्णलाई हार्दिक अपिल गर्दछु ।’ सचिवालय उद्घाटन समारोहमा लुम्बिनी प्रदेश खेलकुद विकास परिषदका निवर्तमान सदस्य सचिव भीम ओली, नेपालगञ्ज उपमहानगरपालिका निवर्तमान उपमेयर उमा थापा मगर, मध्यपश्चिम क्षेत्रीय खेलकुद विकास समिति लुम्बिनी प्रदेशका कार्यालय प्रमुख महेश चन्द लगायतले प्रतियोगिताको सफलतको शुभकामना व्यक्त गरेका थिए ।

प्रकाशित मिति: बिहीबार, पुस ११, २०८१ १८:३१