'महिला फुटबलको उच्चतम् विकासको खाँचो'

खेलकुद

गृहपृष्ठ
खेलकुद
'महिला फुटबलको उच्चतम् विकासको खाँचो'

'महिला फुटबलको उच्चतम् विकासको खाँचो'

शुक्रबार, पुस १२, २०८१ बागेश्वरी पोस्ट

नेपालगञ्ज । युवा तथा खेलकुद मन्त्री तेजुलाल चौधरीले नेपालमा महिला फुटबलको उच्चतम् विकासको खाँचो रहेको बताएका छन् । नेपालगञ्ज रंगशालामा रहेको लुम्बिनी कप महिला फुटबलको सचिवालय निरीक्षणका क्रममा मन्त्री चौधरीले दक्ष खेलाडी उत्पादनका लागि लुम्बिनी कप महिला फुटबलले महत्वपूर्ण अवसर सिर्जना गर्न सक्ने विश्वास समेत व्यक्त गरे ।

मन्त्री चौधरीले लुम्बिनी कप महिला फुटबल शुरुवात हुनु राष्ट्रका लागि गौरवको विषय भएको बताए । लुम्बिनी कप महिला फुटबलको सफलताको शुभकामना समेत ब्यक्त गर्दै मन्त्री चौधरीले प्रतियोगितालाई निरन्तरता दिन पनि आग्रह गरे ।

त्यस अवसरमा लुम्बिनी प्रदेश खेलकुद विकास परिषद्का सदस्य सचिव टिरन गौतमले लुम्बिनी कप महिला फुटबल प्रदेशकै लागि कोशेढुंगा सावित हुने विश्वास व्यक्त गरे । उनले प्रतियोगितालाई सफल बनाउन लुम्बिनी प्रदेश खेलकुद विकास परिषद्ले सक्दो सहयोग गर्ने प्रतिवद्धता जनाए । ‘हामीले प्रतियोगितालाई दृष्टिगत गरेर नेपालगञ्ज रंगशालाको मैदान व्यवस्थापनका लागि राष्ट्रिय खेलकुद परिषदसँग बजेट माग गरेका छौ,' सदस्य सचिव गौतमले भने ।

अन्तरालको आयोजना र बाँके जिल्ला फुटबल संघको सहकार्यमा लुम्बिनी कप महिला फुटबल प्रतियोगिता आगामी फागुन १९ गतेदेखि २९ गतेसम्म नेपालगञ्जमा आयोजना हुँदैछ । प्रतियोगितामा नेपाल र छिमेकी मित्र राष्ट्र भारतका समेत गरी आठ टिम सहभागी हुने अन्तरालका प्रमुख कार्यकारी जयनारायण शाहले बताए । प्रतियोगिता पश्चिम नेपालकै गर्व गर्न लायक इभेन्ट बन्नुका साथै पर्यटन विकासमा समेत कोशेढुंगा सावित हुने शाहको भनाई छ ।

यसैबीच, मन्त्री चौधरीले आजै मध्यपश्चिम क्षेत्रीय खेलकुद विकास समितिको भौतिक पूर्वाधार तथा वस्तुस्थितिका बारेमा जानकारी लिएका छन् । त्यस क्रममा मन्त्री चौधरीलाई क्षेत्रीय खेलकुद विकास समितिका प्रमुख महेश चन्दले समितिको भौतिक अवस्था र खेल गतिविधिबारे जानकारी गराएका थिए । निरीक्षण टोलीमा लुम्बिनी खेलकुद विकास परिषद्का निवर्तमान सदस्य सचिव भीम ओली लगायतको सहभागिता रहेको थियो ।

प्रकाशित मिति: शुक्रबार, पुस १२, २०८१ १९:५३

प्रतिक्रिया दिनुहोस्