प्रादेशिक महोत्सवमा एकै पटक एक हजार जना खेल्न सक्ने बाल उद्यान

अर्थ

गृहपृष्ठ
अर्थ
प्रादेशिक महोत्सवमा एकै पटक एक हजार जना खेल्न सक्ने बाल उद्यान

प्रादेशिक महोत्सवमा एकै पटक एक हजार जना खेल्न सक्ने बाल उद्यान

शुक्रबार, माघ १८, २०८१ बागेश्वरी पोस्ट

नेपालगञ्ज । नेपालगञ्ज उद्योग वाणिज्य संघको आयोजनामा नेपालगञ्जमा जारी प्रादेशिक महोत्सव २०८१ को बाल उद्यानमा एकै पटकमा एक हजार जनाले खेल्न सक्ने दर्जन बढी मनोरञ्जनात्मक खेल छन् । नारायणी फेयर एण्ड एक्जिविसन नेपाल चितवनले ठेक्कामा लिएको बाल उद्यान तथा रमाइलो मेलाका सञ्चालक विद्यार्थी शाहका अनुसार एकै पटक एक सय जना खेल्न मिल्ने नाउडा (ठूलो डुंगा) छ । । ५० जनाले एक साथ खेल्न मिल्ने अर्को सानो डुंगा पनि छ । १० जनाले खेल्ने सानो नाउ पनि छ ।

एकै पटकमा ४० जनाले खेल्न सक्ने ठूलो झुला (पिङ) त दुई दुुई वटा छन् । एउटा मिनी रेल, दुई वटा मिक्की माउस, ब्रेक डान्स, ३ वटा जम्पिङ, ६/६ जना बच्चाले खेल्न मिल्ने नानो कार र धुम बाइक पनि महोत्सवमा राखिएको छ । २४ जना क्षमताको चेरो प्लेन, २० जना क्षमताको मिनी रेल पनि रमाइलो मेलाको आकर्षण हो । सञ्चालक शाह भन्छन्, ‘यी सबै खेल एक साथ खेलाउँदा पनि हामीसँग एकै पटकमा एक हजार जनालाई एक साथ खेलाउन सक्ने क्षमता छ । विदाका दिनमा रमाइलो मेलामा अलि बढी भीड लाग्ने गरेको छ ।’

नेपालगञ्ज उद्योग वाणिज्य संघको प्रादेशिक महोत्सवको बाल उद्यान तथा विविध मनोरञ्जन उप–समितिका संयोजक शिवप्रसाद दाहाल महोत्सबको अर्को आकर्षण बाल उद्यान तथा रमाइलो मेला भएको बताउँछन् । ‘धेरै जनाको रोजाइ नाउडा (ठूलो डुंगा) र अग्लो पिङ हुने गरेको छ । बालबालिकाहरु जम्पिङमा बढी रमाइरहेको देख्छु’, संयोजक दाहाल भन्छन्, ‘कोही स्टलका सामान किन्न आउँछन् । कोही सांगितिक कार्यक्रममा रमाउँछन् । कसैले रमाइलो मेलाबाट मनोरञ्जन लिइरहेका छन् ।’

महोत्सव प्रचार समितिका संयोजक डम्बर बहादुर चन्द महोत्सवमा दिनदिनै दर्शकको आकर्षण बढिरहेको बताउँछन् । उनी बाँकेबासीलाई आव्हान गर्छन्, ‘लामो समयको अन्तरालमा नेपालगञ्जमा प्रादेशिक महोत्सव सञ्चालन भइरहेकाले सबैलाई एक पटक भए पनि मेलामा अवलोकनका लागि आग्रह गर्दछु ।’ प्रचार संयोजक चन्दका अनुसार महोत्सवमा झण्डै ३०० वटा स्टल राखिएका छन् ।

प्रकाशित मिति: शुक्रबार, माघ १८, २०८१ २०:४३

प्रतिक्रिया दिनुहोस्