लुम्बिनी कप महिला फुटबलः पूर्व खेलकुद मन्त्री अथकद्वारा सचिवालय र रंगशाला अनुगमन

खेलकुद

गृहपृष्ठ
खेलकुद
लुम्बिनी कप महिला फुटबलः पूर्व खेलकुद मन्त्री अथकद्वारा सचिवालय र रंगशाला अनुगमन

लुम्बिनी कप महिला फुटबलः पूर्व खेलकुद मन्त्री अथकद्वारा सचिवालय र रंगशाला अनुगमन

आर्थिक र अतिथि संयोजन उपसमितिमा मैनाली र चौधरीको मनोनयन

बिहीबार, माघ २४, २०८१ बागेश्वरी पोस्ट

नेपालगञ्ज । संघीय सरकारका पूर्व खेलकुद मन्त्री एवम् नेकपा माओवादी केन्द्रका नेता महेश्वर गहतराज अथक नेतृत्वको टोलीले लुम्बिनी कप महिला फुटवल प्रतियोगिता तयारी बारे आज जानकारी लिएको छ । प्रतियोगिता आयोजनास्थल नेपालगञ्ज रंगशाला र सचिवालयको अनुगमन गर्ने क्रममा पूर्व मन्त्री अथक नेतृत्वको टोलीले हालसम्म भएका कार्यप्रगतिका बारेमा जानकारी लिएको हो ।

अन्तरालको आयोजना र बाँके जिल्ला फुटबल संघको सहकार्यमा आगामी फागुन १९ देखि २९ गतेसम्म नेपालगञ्जमा लुम्बिनी कप महिला फुटबल हुँदैछ । प्रतियोगितामा भारतका दुई र नेपालका ६ सहित आठ टिमको सहभागिता रहने जनाइएको छ ।

अनुगमनका क्रममा पूर्व मन्त्री अथकलाई अन्तरालका प्रमुख कार्यकारी जयनारायण शाहले अहिलेसम्म भएका तयारीका सम्बन्धमा जानकारी गराउँदै प्रतियोगितालाई भव्यरुपमा सफल बनाउन सरकारी तथा निजी क्षेत्रवाट सहयोग हुनुपर्नेमा जोड दिए ।

त्यस अवसरमा पूर्व मन्त्री अथकले सबै पक्षलाई समेटेर लैजान सकियो भने प्रतियोगिता अवश्य सफल हुने विश्वास व्यक्त गर्दै आफ्नो तर्फबाट सबै खाले सहयोग रहने प्रतिबद्धता जनाए ।

अनुगमन टोलीमा सहभागी राष्ट्रिय खेलकुद परिषद्का सदस्य दिपेन्द्र विष्टले प्रतियोगिता संचालनका लागि आवश्यक रंगशालाको भौतिक पूर्वाधारलाई सुधार गर्न केन्द्रीय तहमै कुरा गर्ने बताए ।

अनुगमन टोलीमा राष्ट्रिय खेलकुद परिषद् लुम्बिनी प्रदेश सदस्य जनक केसी, बाँके जिल्ला फुटबल संघका सदस्य कर्ण बस्नेत, साविक मध्यपश्चिम खेलकुद विकास समिति लुम्बिनी प्रदेशका प्रमुख महेश चन्द, लुम्बिनी कप महिला फुटबल मिडिया संयोजक नीरज गौतम, सचिवालय प्रमुख रमेश मल्ल, समन्वय तथा परिचालन उपसमिति संयोजक तेज विक्रम शाह लगायतको सहभागिता रहेको थियो ।

यसैबीच लुम्बिनी कप महिला फुटवलको तयारीलाई तिव्रता दिने क्रममा आर्थिक र अतिथि संयोजन उपसमितिको संयोजक मनोनयन गरिएको छ ।

आर्थिक उपसमितिको संयोजकमा राष्ट्रिय खेलकुद परिषद् (राखेप) का पूर्व सदस्य विनोद मैनाली र अतिथि संयोजन उपसमितिको संयोजकमा राखेपाका पूर्व सदस्य सुमित्रा चौधरीलाई मनोनयन गरिएको अन्तरालका प्रमुख कार्यकारी जयनारायण शाहले जानकारी दिए ।

प्रकाशित मिति: बिहीबार, माघ २४, २०८१ १८:५८