मेयर कप अन्तर विद्यालय बाँके जिल्ला स्तरीय छात्र फुटबल प्रतियोगिता शनिबारदेखि

खेलकुद

गृहपृष्ठ
खेलकुद
मेयर कप अन्तर विद्यालय बाँके जिल्ला स्तरीय छात्र फुटबल प्रतियोगिता शनिबारदेखि

मेयर कप अन्तर विद्यालय बाँके जिल्ला स्तरीय छात्र फुटबल प्रतियोगिता शनिबारदेखि

बिहीबार, माघ २४, २०८१ बागेश्वरी पोस्ट

नेपालगञ्ज । मेयर कप अन्तर विद्यालय जिल्ला स्तरीय छात्र फुटबल प्रतियोगिता शनिबारदेखि सुरु हुँदैछ । प्रतियोगिताको उद्घाटन खेलमा डिफेन्डिङ च्याम्पियन नेपालगञ्ज सेन्ट जेभिर्यस स्कुल र होप इन्टरनेसनल स्कुलले प्रतिस्पर्धा गर्ने भएका छन् । बाँके जिल्ला फुटबल संघको आयोजनामा मेयर कप फुटबल प्रतियोगिता नेपालगञ्ज रंगशालामा हुँदैछ ।

मेयर कप फुटबल प्रतियोगिता–२०८१ को छात्र तर्फ २१ विद्यालयको सहभागिता रहेको छ । नेपालगञ्ज रंगशालामा आज सार्वजनिक गरिएको खेल तालिकाको समूह ‘ए’ मा नेपालगञ्ज सेन्ट जेभियर्स स्कुल, होप इन्टरनेशनल, पशुपति मावि राँझा, ब्राइटल्याण्ड मावि, ड्रिमल्याण्ड, मनकामना, सगरमाथा, राम मावि, मोर्डन पब्लिक र जीवनज्योती स्कुल रहेका छन् ।

यसैगरी समूह ‘बी’ मा आदर्श मावि राँझा, जय बागेश्वरी स्कुल, मुनतारा, ग्रीनपीस, आर्दश मावि नेपालगञ्ज, सेन्टथोमस, सिद्धार्थ विद्या सदन फुल्टेक्रा, धम्बोझी मावि, मंगल प्रसाद मावि, युनाइटेड र नेपालगञ्ज मोडेल एकेडेमी रहेका छन् । प्रतियोगिताको फाइनल खेल फागुन ३ गते हुनेछ । यसैगरी मेयर कप छात्रा फुटबल तर्फको खेल तालिका केही दिनमा सार्वजनिक गरिने आयोजक बाँके जिल्ला फुटबल संघले जनाएको छ । छात्रा तर्फको प्रतिस्पर्धामा सहभागी हुने टिमको संख्या कम भएका कारण केही दिनपछि खेल तालिका सार्वजनिक गरिने संघले जानकारी गराएको छ ।

हरेक वर्ष बाँके जिल्ला फुटबल संघले आयोजना गर्दै आएको मेयर कप अन्तर विद्यालय फुटबल प्रतियोगिताबाट उत्कृष्ट खेलाडी छनोट गरेर बाँके जिल्लाको टिम तयारी पारिने बाँके जिल्ला फुटबल संघका अध्यक्ष एवम् अखिल नेपाल फुटबल संघका केन्द्रिय सदस्य भोजराज शाहीले बताए ।

प्रकाशित मिति: बिहीबार, माघ २४, २०८१ २०:५१

प्रतिक्रिया दिनुहोस्