मेयर कप फुटबलः आदर्श मावि राँझा, ग्रिनपिस र आदर्श मावि नेपालगञ्ज विजयी

खेलकुद

गृहपृष्ठ
खेलकुद
मेयर कप फुटबलः आदर्श मावि राँझा, ग्रिनपिस र आदर्श मावि नेपालगञ्ज विजयी

मेयर कप फुटबलः आदर्श मावि राँझा, ग्रिनपिस र आदर्श मावि नेपालगञ्ज विजयी

आइतबार, माघ २७, २०८१ बागेश्वरी पोस्ट

नेपालगञ्ज । आदर्श मावि राँझा, ग्रिनपिस स्कुल कोहलपुर र आदर्श मावि नेपालगञ्जले मेयर कप अन्तर विद्यालय जिल्ला स्तरीय छात्र फुटबल प्रतियोगितामा जित हासिल गरेका छन् ।

नेपालगञ्ज रंगशालामा आज भएको पहिलो खेलमा आदर्शले जय बागेश्वरी स्कुललाई ३–२ ले पराजित गरेको छ । आदर्शको जितमा खगेन्द्र थापाले २ गोल र आकाश सुनारले १ गोल गरे । प्लेयर अफ द म्याचको ट्रफी जित्न सफल खगेन्द्रले २३औं र ३१औं मिनेटमा गोल गरेका थिए भने आकाशले १४औं मिनेटमा गोल गरेका थिए । जय बागेश्वरीको तर्फबाट करण शाहीले २५औं मिनेट र विवेक चौधरीले २०औं मिनेटमा गोल गरेका थिए । प्लेयर अफ द म्याच खगेन्द्रलाई प्रदेश खेलकुद परिषद लुम्बिनीका जनक केसीले ट्रफी प्रदान गरेका थिए ।

दोस्रो खेलमा दिपेश भण्डारीले निर्णायक गोल गरेपछि ग्रिनपिसले मुनतारा स्कुल राँझालाई १–० ले पराजित गरेको छ । प्लेयर अफ द म्याच दिपेशले खेलको ५८औं मिनेटमा गोल गरेका थिए । दिपेशलाई नेपाल पत्रकार महासंघ बाँकेका पूर्व अध्यक्ष वरिष्ठ पत्रकार निरज गौतमले ट्रफी प्रदान गरे । यसैगरी तेस्रो खेलमा आदर्शले पेनाल्टी सुटआउटमा सेन्ट थोमस स्कुललाई ३–१ ले पराजित गरेको थियो । निर्धारित समयमा खेल गोलरहित बराबरीमा सकिएको थियो । पेनाल्टी सुटआउटमा आदर्शको लागि सन्दिप बुढा, रोशन घर्तिमगर र सक्षम थापा मगरले गोल गरेका थिए । सेन्ट थोमसको लागि अमन केसीले मात्र गोल गर्न सके । खेलको प्लेयर अफ द म्याच राकेश चौधरीलाई पूर्व राष्ट्रिय फुटबल खेलाडी एवम् एनजिओ फेडरेशन बाँकेका पूर्व अध्यक्ष तेजबिक्रम शाहले पुरस्कृत गरे ।

धम्बोझी मावि र सिद्धार्थ विद्या सदनबीचको खेल कमजोर प्रकाश ‘भिजिबिलीटी’ का कारण गोलरहित बराबरीको अवस्थामा स्थगित गरिएको छ । स्थगित गरिएको खेल सोमबार बिहान खेलाइने आयोजक टिमले जनाएको छ । बाँके जिल्ला फुटबल संघको आयोजनामा सुरु भएको प्रतियोगिताको छात्रतर्फ २१ टिमको सहभागिता रहेको छ । प्रतियोगिता फागुन ३ गतेसम्म चल्नेछ ।

प्रकाशित मिति: आइतबार, माघ २७, २०८१ २१:३१

प्रतिक्रिया दिनुहोस्