भेट्रान ब्याडमिन्टन प्रतियोगिताको उपाधि रमेश र टेक बहादुरले जिते

खेलकुद

गृहपृष्ठ
खेलकुद
भेट्रान ब्याडमिन्टन प्रतियोगिताको उपाधि रमेश र टेक बहादुरले जिते

भेट्रान ब्याडमिन्टन प्रतियोगिताको उपाधि रमेश र टेक बहादुरले जिते

सोमबार, माघ २८, २०८१ बागेश्वरी पोस्ट

नेपालगञ्ज । नेपालगञ्जमा आयोजना गरिएको प्रथम आन्तरिक भेट्रान ब्याडमिन्टन प्रतियोगिताको उपाधि रमेश श्रेष्ठ र टेक बहादुर गुरुङले जितेका छन् । खुल्लातर्फ कमल देवकोटा र अज बहादुर शाहीको जोडी प्रथम भएको छ । नेपालगञ्ज उपमहानगरपालिका वडा नम्बर १ स्थित धम्बोझी ब्याडमिन्टन प्रशिक्षण केन्द्रले आयोजना गरेको ५० वर्षमाथिको भेट्रान प्रतियोगितामा रमेश र टेकको जोडीले किशोर आचार्य र ऋषिजंग शाहको जोडीलाई २१-११, २१-१२ अंकको सोझो सेटमा पराजित गर्दै उपाधि जितेको हो ।

उपाधिसंगै रमेश र टेकको जोडीले ७ हजार रुपैयाँ पुरस्कार पाएको छ । द्वितीय भएको किशोर र ऋषिजंगको जोडीले ५ हजार पाएको छ । भेट्रानमा जनार्दन रत्न मल्ल र अर्जुन खड्का तथा भोलानाथ सिटौला र अर्जुन रानाको जोडीले तृतीय हुँदै दुई-दुई हजार पाएका छन् । खुल्लातर्फ कमल र अज बहादुरको जोडीले पवन चौधरी र बुद्धि लाल श्रेष्ठको जोडीलाई २-१ को सेटमा पराजित गर्दै उपाधिसहित ७ हजार जितेको छ । पहिलो सेट २१-१२ अंकले जितेको कमल र अज बहादुरको जोडी दोस्रो सेटमा २१-१२ मै पराजित भएको थियो । तेस्रो सेट २१-१३ ले जित्दै कमल र अज बहादुरको जोडी प्रथम भयो ।

द्वितीय भएको पवन र बुद्धि लालको जोडीले ५ हजार पुरस्कार पायो । खुल्लामा सन्दीप चौधरी र मनु गुप्ता तथा सन्तोष शाही र मदनराज उपाध्यक्षको जोडी तृतीय भयो । तृतीयले दुई हजार पुरस्कार पाए । प्रतियोगिताका विजेताहरुलाई नेपालगञ्जका मेयर प्रशान्त विष्ट, प्रमुख जिल्ला अधिकारी खगेन्द्र रिजाल, एसपी तुलबहादुर कार्की, वडा नम्बर १ का अध्यक्ष प्रमोद रिजाल लगायतले पुरस्कार वितरण गरेका थिए ।

प्रतियोगिताको फाइनल अघि मेयर विष्ट र वडाध्यक्ष रिजाल तथा प्रमुख जिल्ला अधिकारी रिजाल र एसपी कार्कीको जोडीले मैत्रीपूर्ण खेल खेलेका थिए । जसमा प्रजिअ र एसपीको जोडी विजयी भयो । प्रशिक्षण केन्द्रका अध्यक्ष जनार्दनरत्न मल्लका अनुसार, ५० वर्षमाथिको भेट्रानमा २० र खुल्लामा २६ टिमको सहभागिता रहेको थियो ।

प्रकाशित मिति: सोमबार, माघ २८, २०८१ २१:०३