कोहलपुर गोल्डकप: प्लानिङ व्याइज काठमाडौं सेमिफाइनल प्रवेश

खेलकुद

गृहपृष्ठ
खेलकुद
कोहलपुर गोल्डकप: प्लानिङ व्याइज काठमाडौं सेमिफाइनल प्रवेश

कोहलपुर गोल्डकप: प्लानिङ व्याइज काठमाडौं सेमिफाइनल प्रवेश

सोमबार, फागुन १९, २०८१ बागेश्वरी पोस्ट

नेपालगन्ज । बाँकेको कोहलपुरमा जारी तेस्रो मुख्यमन्त्री कोहलपुर गोल्डकप फुटबल प्रतियोगितामा राइनो फुटबल क्लब गण्डकीलाई हराउँदै प्लानिङ व्वाइज युनाइटेड क्लब काठमाडौँ विजयी भएको छ । प्रतियोगिताको तेस्रो दिन सोमबार कोहलपुर–२ स्थित तेह्र विगाह खेल मैदानमा भएको खेलमा राइनो फुटबल क्लबलाई २–० गोल अन्तरले पराजित गर्दै प्लानिङ व्वाइज युनाइटेड क्लबले सहज जित हासिल गरेको हो ।

खेलको पहिलो हाफ गोलरहित बराबरीमा सकिएको थियो । दुवै टोलीले गोलका लागि थुप्रै प्रयास गरे पनि सफल हुन सकेनन् । दोस्रो हाफको ४७औँ मिनेटमा गोल गर्दै प्लानिङ व्वाइज युनाइटेड क्लबका जर्सी नम्बर २८ का विदेशी खेलाडी एलेक्सले टिमलाई अग्रता दिलाएका थिए । दोस्रो हाफमा प्लानिङ व्वाइज विपक्षी राइनो फुटबल क्लबमाथि हाबी भएको थियो । खेलको अतिरिक्त समयमा मैदान प्रवेश गरेका प्लानिङ व्वाइजका जर्सी नम्बर १४ का सरोज कार्कीले गोल गरेर सहज जित दिलाए ।

खेलमा प्लानिङ व्वाइज युनाइटेड क्लबका एलेक्स म्यान अफ द म्याच घोषित भए । उनलाई कोहलपुर नगरपालिकाका प्रमुख प्रशासकीय अधिकृत मानबहादुर गिरी, कोहलपुर नगरपालिका वडा नम्बर १३ का वडा अध्यक्ष डम्बर बहादुर खड्का र कोहलपुर उद्योग वाणिज्य संघका पूर्व अध्यक्ष चिन्तामणि धितालले नगद पाँच हजारसहित पुरस्कृत गरेका थिए । प्रतियोगिताको अन्तिम क्वाटरफाइनल खेल मंगलबार दिउँसो ३ः३० बजे अफ्रिकन घाना फुटबल क्लब र काँक्रेविहार फुटबल क्लब सुर्खेतबीच हुने खेल संयोजक कर्ण बस्नेतले बताए । क्वाटर फाइनल समीकरण सकिएसँगै बुधबारदेखि सेमिफाइनल समीकरण सुरु हुने संयोजक बस्नेतले बताए ।

सोमबार गोल्डकपको तेस्रो क्वाटरफाइलन खेल जित्दै प्लानिङ व्वाइज युनाइटेड क्लब सेमिफाइनल प्रवेश गरेको छ । यसअघि आयोजक कोहलपुर रेसिङ साहारा फुटबल क्लब कोहलपुर र राइजिङ स्टार फुटबल क्लब नवलपरासी सेमिफाइनल प्रवेश गरिसकेका छन् ।

कोहलपुर रेसिङ साहारा फुटबल क्लब बाँकेको आयोजनामा फागुन १७ देखि प्रतियोगिता सुरु भएको हो । प्रतियोगितामा घाना र भारतसहित आठ वटा टिमको सहभागिता रहेको छ । प्रतियोगितामा प्रथम हुने टिमले आठ लाख रुपैयाँ र द्वितीय हुने टिमले चार लाख रुपियाँ पुरस्कार पाउनेछन् । तेस्रो मुख्यमन्त्री कोहलपुर गोल्डकप फागुन २४ गतेसम्म सञ्चालन हुनेछ ।

प्रकाशित मिति: सोमबार, फागुन १९, २०८१ १९:३९