विभिन्न कार्यक्रम गरी सहकारी दिवस मनाइँदै

अर्थ

गृहपृष्ठ
अर्थ
विभिन्न कार्यक्रम गरी सहकारी दिवस मनाइँदै

विभिन्न कार्यक्रम गरी सहकारी दिवस मनाइँदै

शुक्रबार, चैत ८, २०८१ बागेश्वरी पोस्ट

नेपालगञ्ज । जिल्ला सहकारी संघ बाँकेले ६८औं राष्ट्रिय सहकारी दिवस विभिन्न कार्यक्रमको आयोजना गरी मनाउने भएको छ । दिवसको तयारी बारे जानकारी दिन आज नेपालगञ्जमा आयोजित पत्रकार सम्मेलनमा संघका अध्यक्ष प्रेम प्रसाद सुवेदीले आगामी २० गते भव्य कार्यक्रमको आयोजना गरी दिवस मनाउन लागिएको बताए ।

उनका अनुसार दिवसलाई भव्यता दिन अन्तरक्रिया, रक्तदान, पालिका स्तरीय र्‍याली, उत्कृष्ट सहकारी र सहकारीकर्मीलाई सम्मानित गर्ने लगायतका कार्यक्रमको आयोजना गरिएको छ । ‘दिवसको अवसरमा साताव्यापी कार्यक्रम नै आयोजना गरिएको छ,' उनले भने–‘सहकारीप्रति मानिसहरुको नकारात्मक भावना चिर्न पनि दिवसलाई भव्यता दिन लागिएको हो ।’

शनिवार नेपालगञ्जमा जिल्ला स्तरीय जागरण भेलाको आयोजना गरिएको उनले बताए । त्यसैगरी बैजनाथ, कोहलपुर, नेपालगञ्ज र राप्तीसोनारीमा वृहत रक्तदान कार्यक्रमको आयोजना गरिएको पनि उनले बताए । ११ गते बैजनाथमा, १२ गते कोहलपुर, १३ गते नेपालगञ्ज र १४ गते राप्तीसोनारीमा रक्तदान कार्यक्रमको आयोजना गरिएको सुवेदीले बताए । यसैगरी १७ र १८ गते कार्यशाला गोष्ठीको आयोजना गरिएको पनि उनले पत्रकार सम्मेलनमा सुनाए ।

दिवसको मुख्य दिन २० गते भने पालिका स्तरीय र्‍यालीसहितका कार्यक्रम राखिएको सुवेदीको भनाई छ । ‘मर्यादित सहकारीः सम्मुनत समाज’ भन्ने मुख्य नाराका साथ ६८औं सहकारी दिवस मनाउन लागिएको हो । पत्रकार सम्मेलन जिल्ला सहकारी संघका सदस्यहरु महेन्द्र मल्ल ठकुरी, प्रेम शाह, प्रबन्ध सञ्चालक नवराज उपाध्याय लगायतको उपस्थिति थियो । बाँकेमा ४०८ वटा सहकारी छन् । ती मध्ये २० प्रतिशत सहकारी निष्क्रिय अवस्थामा रहेको पनि उनले बताए । दुई वटा सहकारीमा भने समस्या देखिएको उनको भनाई छ ।

प्रकाशित मिति: शुक्रबार, चैत ८, २०८१ २०:३०

प्रतिक्रिया दिनुहोस्