वैदेशिक रोजगारलाई सुरक्षित बनाउन वित्तीय साक्षरता

स्थानीय

गृहपृष्ठ
स्थानीय
वैदेशिक रोजगारलाई सुरक्षित बनाउन वित्तीय साक्षरता

वैदेशिक रोजगारलाई सुरक्षित बनाउन वित्तीय साक्षरता

सोमबार, चैत ११, २०८१ बागेश्वरी पोस्ट

नेपालगञ्ज । वैदेशिक रोजगारलाई सुरक्षित बनाउन बाँकेको कोहलपुरमा वित्तीय साक्षरता र मनोसामाजिक परामर्श कक्षा प्रभावकारी बन्दै गएको छ । वैदेशिक रोजगारीमा रहेका व्यक्तिहरुका परिवारलाई लक्षित गरेर सुरक्षित आप्रवासन (सामी) कार्यक्रम सुरु भएपछि यसको प्रभावकारिता देखिन थालेको छ । वित्तीय साक्षरता कक्षा सुरु भएको कोहलपुर नगरपालिका वडा नम्बर १४ स्थित सिर्जना वित्तीय साक्षरता र मनोसामाजिक परामर्श कक्षाको अनुगमनका क्रममा सहभागीहरुले यसको प्रभावकारिताबारे आ-आफ्नो भनाई सुनाएका थिए ।

स्थानीय सुशिला सुनारले वैदेशिक रोजगारका अवसर, सम्भावना र जोखिमबारे राम्रोसँग बुझ्ने अवसर मिलेको बताइन् । उनले त्यति मात्र नभएर वैदेशिक रोजगारबाट प्राप्त रकमको सदुपयोग गर्ने तवरतरिका समेत सिकेको बताइन् । ‘विदेशबाट कमाएर पठाउने रकम कसरी जोगाउन सकिन्छ भन्ने बारे थाहा नै थिएन,' उनले भनिन्–‘वित्तीय साक्षरता कक्षाले त्यो कुरा सिकायो ।’ स्थानीय गीता सुनारले पनि वैदेशिक रोजगारमा हुने ठगी न्यूनीकरणमा धेरै कुराहरु जानकारी प्राप्त भएको बताइन् । उनले आफ्नो छोरालाई भिजिट भिसामा दुबई पठाएकी थिइन् । तर, छोराले काम नपाएपछि ठूलो तनावमा थिइन् । उनी डिप्रेसनको सिकार भइसकेकी थिइन् । तर, सामी कार्यक्रम अन्तरगत उहाँलाई मनोसामाजिक परामर्श सेवा मात्रै प्रदान गरिएन, छोराले विदेशमा पाइरहेको दुःख समेत हल भयो । उनी अहिले खुसी छिन् ।

वैदेशिक रोजगारीमा देखिएका समस्या न्यूनीकरण गर्न र वैदेशिक रोजगारलाई सुरक्षित बनाउनको लागि सामी परियोजना प्रभावकारी बनेको वित्तीय सहजकर्ता अनिता रावतले बताइन् । सामी परियोजनाले सञ्चालन गरिरहेका गतिविधि र त्यसबाट आएको सकारात्मक परिणाम, वैदेशिक रोजगारको क्रममा देखिएका समस्या, वैदेशिक रोजगारको अहिलेको चुनौती र कानूनी जटिलताका साथै वैदेशिक रोजगारमा हुने गरेको ठगी, आप्रवासी स्रोत केन्द्रले गर्ने काम, मनोविमर्श सेवा तथा वित्तीय साक्षरता कक्षाको विषमया जानकारी प्रदान गर्ने गरिएको उनको भनाई छ ।

अनुगमनका क्रममा नगर प्रमुख पुर्ण प्रसाद आचार्यले सामी परियोजनाले सञ्चालन गरिरहेका गतिविधिले वैदेशिक रोजगारका कारण उत्पन्न पारिवारिक तथा सामाजिक समस्यासँग जुध्न सहज बनाएको बताए । नगर उपप्रमुख संगिता सुवेदीले यस्ता कार्यक्रमले विदेशबाट आउने रकमको सदुपयोग गर्न सहयोग गर्ने बताए । उनले सीपमुलक कार्यक्रममार्फत महिलाहरुलाई सम्बृद्ध बनाउन सकिने धारणा राखे । कोहलपुर नगरपालिका रोजगार केन्द्रका प्रमुख आशिष वर्माले बैदेशिक रोजगारमा जानेहरुको संख्या बढेसंगै वैदेशिक रोजगारका समस्याहरु बढ्दै गएकाले स्थानीय सरकार तथा सरोकारवालाहरुले आप्रवासनलाई सुरक्षित बनाउने विषय प्राथमिकतामा राखेको बताए ।

अनुगमन कार्यक्रममा कोहलपुर नगरपालिकाका प्रमुख प्रशासकीय अधिकृत मान बहादुर गिरी, कोहलपुर नगरपालिकाका प्रवक्ता समेत रहेका वडा नम्बर १४ का अध्यक्ष नमबहादुर आले, वडा नम्बर ७ का अध्यक्ष ठग्गा थारु, आर्थिक विकास समितिका संयोजक अनिता बुढा क्षेत्री, कोहलपुर नगरपालिकाका प्रेस संयोजक प्रियास्मृति ढकाल लगायतको सहभागिता रहेको मनोसामाजिक परामर्शकर्ता कृष्टि आचार्यले जानकारी दिइन् ।

प्रकाशित मिति: सोमबार, चैत ११, २०८१ २१:२३