कोहलपुर नगर स्तरीय फुटबलमा वडा नम्बर १४ च्याम्पियन

खेलकुद

गृहपृष्ठ
खेलकुद
कोहलपुर नगर स्तरीय फुटबलमा वडा नम्बर १४ च्याम्पियन

कोहलपुर नगर स्तरीय फुटबलमा वडा नम्बर १४ च्याम्पियन

शुक्रबार, चैत २९, २०८१ बागेश्वरी पोस्ट

कोहलपुर (बाँके) । कोहलपुर नगरपालिका वडा नम्बर–१४ नगर स्तरीय फुटबल प्रतियोगिता-२०८१ को च्याम्पियन बनेको छ । कोहलपुर नगरपालिका–८ झरकट्टी खेल मैदानमा आज भएको फाइनल खेलमा वडा नम्बर-१३ लाई १-० गोलले हराउँदै वडा नम्बर १४ च्याम्पियन बनेको हो ।

उपाधिसँगै वडा नम्बर-१४ ले ७५ हजार रुपैयाँ पुरस्कार प्राप्त गरेको छ । उपविजेता वडा नम्बर-१३ ले भने ३५ हजार रुपैयाँ पुरस्कार प्राप्त गरेको हो । खेलको पहिलो हाफको ३१ मिनेटमा वडा नम्बर-१४ का एलिस परियारले गोल गरेका थिए । परियाको गोल नै निर्णायक बन्यो । वडा नम्बर-१३ को टीमले थुप्रै अवसर पाए पनि गोल गर्न असफल बन्यो । खेलको दोस्रो हाफ निकै रोमाञ्चक बनेको थियो । प्रतियोगितामा बेष्ट गोलकिपर छेवान थापा, बेष्ट डिफेन्डर राज सारु मगर र बेष्ट खेलाडी भने युनिस क्षेत्री बनेका छन् ।

कोहलपुर नगर खेलकुद विकास समितिको आयोजनामा पहिलो पटक प्रतियोगिता सञ्चालन गरिएको हो । सो अवसरमा बोल्दै कोहलपुर नगरपालिका प्रमुख पूर्ण प्रसाद आचार्यले प्रतियोगितामा धेरै युवा खेलाडीहरुले आफ्नो प्रतिभा प्रस्फुटन गर्ने अवसर पाएको बताए । गोल्डकपमा स्थानीय खेलाडीहरुको सहभागिताको लागि यस प्रतियोगिताबाट खेलाडी छनोट गर्ने मुख्य उद्देश्य रहेको उनको भनाई थियो । उनले स्थानीय खेलाडीहरुको प्रोत्साहन गर्न स्थानीय सरकार लागिपरेको बताए ।खेलकुदबाटै कोहलपुरलाई चिनाउन सकिने उपप्रमुख संगिता सुवेदीले बताइन् । उनले खेलकुदबाट युवाहरुलाई सकरात्मक सोचको विकास गर्न र स्वस्थ राख्न मद्दत पुग्ने उल्लेख गरिन् ।

प्रकाशित मिति: शुक्रबार, चैत २९, २०८१ २२:३३

प्रतिक्रिया दिनुहोस्