लुम्बिनी कप महिला फुटबलको टिकटमा विद्यार्थीलाई ५० प्रतिशत छुटको व्यवस्था

खेलकुद

गृहपृष्ठ
खेलकुद
लुम्बिनी कप महिला फुटबलको टिकटमा विद्यार्थीलाई ५० प्रतिशत छुटको व्यवस्था

लुम्बिनी कप महिला फुटबलको टिकटमा विद्यार्थीलाई ५० प्रतिशत छुटको व्यवस्था

बुधबार, वैशाख ३, २०८२ बागेश्वरी पोस्ट

नेपालगञ्ज । यही बैशाख ५ गतेदेखि नेपालगञ्जमा हुन लागेको सर्वाधिक राशीको लुम्बिनी कप अन्तर्राष्ट्रिय आमन्त्रण महिला फुटबल प्रतियोगितामा विद्यार्थीहरुका लागि सहुलियत दरमा टिकटको व्यवस्था गरिएको छ । आयोजक अन्तरालका अनुसार नर्मल प्यारापिटतर्फ रु. २०० मूल्य टिकट रहेको विद्यार्थीहरुका लागि पचास प्रतिशत सहुलियतमा रु. १०० को टिकटको व्यवस्था गरिएको छ ।

त्यस्तै भीआइपी प्यारापिटतर्प सिजनल टिकटका लागि रु. १५ सय मूल्य कायम गरिएको छ । सिजनल टिकट लिनेको सिट जति बेला आए पनि सुरक्षित रहने अन्तरालका कार्यकारी निर्देशक जयनारायण शाहले जानकारी दिए । दर्शकहरुको सहजताका लागि टिकटहरु ई-सेवा अनलाइनवाट तथा ई-सेवाले नेपालगञ्ज रंगशालाको मूल गेट बाहिर राख्ने काउण्टरबाट खरिद गर्न सकिने व्यवस्था मिलाइएको छ । यस्तै नेपालगञ्जका विभिन्न क्याफेहरुमा राखिएका टिकट काउण्टरवाट समेत सहज तरिकाले टिकट खरिद गर्न सकिनेछ ।

बाँके जिल्ला फुटबल संघको सहकार्यमा हुन लागेको लुम्बिनी कप फुटबल प्रतियोगितामा भारत सिलगुडीको फुटबल क्लबसंगै आठ टिमको सहभागिता रहेको छ । प्रतियोगितामा बाँके–११, सशस्त्र प्रहरी बलको एपीएफ, नेपाल पुलिस क्लब, त्रिभुवन आर्मी क्लब, कर्णाली एफसी, सुदुरपश्चिम एफसी, सिलगुडी फुटबल क्लब, रौतहट जिल्ला फुटबल संघ टिमले प्रतिष्पर्धा गर्नेछन् ।

मिडिया संयोजक निरज गौतमका अनुसार प्रतियोगिताका विजेता टिमले रु. ५ लाख ५ हजार ५५५ र उपविजेता टिमले रु. दुई लाख ५० हजारसहित ट्रफी तथा मेडल प्राप्त गर्नेछन् । यसैगरी प्रतियोगिताको सम्पूर्ण तयारी पूरा भएको जनाइएको छ । वैशाख ५ गतेदेखि १२ गतेसम्म चल्ने प्रतियोगितालाई भव्य र सभ्य बनाउन रंगशाला सरसफाई, रंगरोगन, खेलाडी आवास तथा यातायातको ब्यबस्था लगायतका काम पूरा भइसकेको छ ।

प्रकाशित मिति: बुधबार, वैशाख ३, २०८२ २०:४२

प्रतिक्रिया दिनुहोस्