भलिबल प्रतियोगितामा महिलातर्फ आदर्श र पुरुषतर्फ धम्बोझी मावि प्रथम

खेलकुद

गृहपृष्ठ
खेलकुद
भलिबल प्रतियोगितामा महिलातर्फ आदर्श र पुरुषतर्फ धम्बोझी मावि प्रथम

भलिबल प्रतियोगितामा महिलातर्फ आदर्श र पुरुषतर्फ धम्बोझी मावि प्रथम

शनिबार, जेठ ३१, २०८२ बागेश्वरी पोस्ट

नेपालगञ्ज । नेपालगञ्जमा आयोजित प्रथम नगर मावि स्तरीय मेयर कप महिला तथा पुरुष भलिबल प्रतियोगिता अन्तरगत महिलातर्फ आदर्श मावि र पुरुषतर्फ धम्बोझी मावि प्रथम भएका छन् । नेपालगञ्ज रंगशालास्थित कबर्ड हलमा शुक्रबार सम्पन्न महिलातर्फको फाइनल खेलमा आदर्श माविले युनाइटेड एजुकेशनल एकेडेमीलाई २५-१६, २५-१३ ले पराजित गर्दै प्रथम हुन सफल भयो । युनाइटेडले दोस्रोमै चित्त बुझायो । जय बागेश्वरी माविले सगरमाथा माविलाई २५-१९, २५-१६ ले पराजित गर्दै तेस्रो भयो ।

त्यस्तै पुरुषतर्फ धम्बोझी माविले जय जनता मावि थपुवालाई २५-१६, २५-१६ ले पराजित गर्दै प्रथम भयो । मंगल प्रसाद माविले युनाइटेडलाई २५-१८, २४-२६ र २५-२२ ले पराजित गर्दै तेस्रो भयो । दुबै इभेन्टमा प्रथम हुने टिमले नगद २० हजार, दोस्रो हुने टिमले नगद १५ हजार र तेस्रो हुने टिमले नगद १० हजारसहित ट्रफी, मेडल र प्रमाणपत्र प्राप्त गरेका छन् । प्रतियोगितामा उत्कृष्ट प्रदर्शन गरेका धम्बोझी माविका श्यामलाल बिश्वकर्मा पुरुषतर्फ र आदर्श माविकी ग्रेष्ना चिलवाल महिलातर्फ उत्कृष्ट खेलाडी घोषित भए ।

बिजयी हुने टिमलाई नेपालगञ्ज उपमहानगरपालिकाका मेयर प्रशान्त बिष्ट, लुम्बिनी प्रदेशका पूर्व मन्त्री एवम ओलम्पियन सुरेन्द्र हमाल, समाजका कार्यबाहक अध्यक्ष निजामुद्दिन सिद्दिकी, ओलम्पियन पार्वती थापा लगायतले पुरस्कार, ट्रफी तथा प्रमाणपत्र बितरण गरेका थिए ।

पूर्व खेलाडी समाज बाँकेको आयोजना तथा नेपालगञ्ज उपमहानगरपालिकाको सहयोगमा उक्त प्रतियोगिता सञ्चालन भएको थियो । प्रतियोगितामा नेपालगञ्ज उपमहानगर क्षेत्रका १३ वटा विद्यालयका पुरुषतर्फ १० र महिलातर्फ १० गरी कुल २० वटा टिमको सहभागिता रहेको समाजका सचिव नरेन्द्र थापाले जानकारी दिएका छन् ।

समापन समारोहमा बिगत ५ दशकदेखि नेपाली खेलकुद क्षेत्रमा महत्वपूर्ण योगदान पुर्‍याएका नेपालगञ्ज वडा नम्बर १८ कारकाँदो निवासी अशोक जंग थापालाई दोसल्ला र ढाका टोपी लगाएर कदरपत्रले सम्मानित गरिएको थियो ।

प्रकाशित मिति: शनिबार, जेठ ३१, २०८२ १७:४३