लुम्बिनी प्रदेशको महिला ह्याण्डबल टोली गण्डकी कपका लागि पोखरा प्रस्थान

खेलकुद

गृहपृष्ठ
खेलकुद
लुम्बिनी प्रदेशको महिला ह्याण्डबल टोली गण्डकी कपका लागि पोखरा प्रस्थान

लुम्बिनी प्रदेशको महिला ह्याण्डबल टोली गण्डकी कपका लागि पोखरा प्रस्थान

बुधबार, असार ११, २०८२ बागेश्वरी पोस्ट

नेपालगञ्ज । गण्डकी प्रदेश खेलकुद परिषदको आयोजनामा यही असार १२ देखि १४ गतेसम्म पोखरामा हुने 'गण्डकी कप राष्ट्रिय महिला ह्याण्डबल प्रतियोगिता' मा सहभागी हुन लुम्बिनी प्रदेशको महिला टोली मंगलबार पोखरातर्फ प्रस्थान गरेको छ । १३ सदस्यीय टोलीलाई नेपाल राष्ट्रिय माध्यमिक विद्यालय बाँसगढी बर्दियामा औपचारिक कार्यक्रम गरी बिदाई गरिएको हो ।

कार्यक्रममा विभिन्न वक्ताहरूले प्रेरणादायी मन्तव्य दिएका थिए । लुम्बिनी प्रदेश ह्याण्डबल संघका अध्यक्ष जयन्त कुमार शर्माले टोलीको मेहनत, समर्पण र अनुशासनको प्रशंसा गर्दै महिला खेलाडीहरूले प्रदेशको गौरव बढाउने काम गर्दै आएको बताए । उनले गण्डकी कपमा समेत उत्कृष्ट प्रदर्शन गर्दै लुम्बिनीको झण्डा फर्फराउनेमा आफू विश्वस्त रहेको बताउनँदै यो प्रतियोगिता केवल प्रतियोगिता मात्र नभई नेतृत्व र प्रेरणाको अवसर पनि भएको उल्लेख गरे । उनले टोलीलाई रु. ३,००० खाजाका लागि सहयोग गर्दै सफलताको शुभकामना समेत व्यक्त गरे । त्यस्तै लुम्बिनी प्रदेश ह्याण्डबल संघका अध्यक्ष खगेन्द्र चन्दले संघ सधैं खेलाडीहरूको साथमा रहने र आगामी दिनमा थप अवसर सृजना गरिने प्रतिबद्धता जनाए ।

मध्यपश्चिम क्षेत्रीय खेलकुद विकास समिति नेपालगञ्जका कार्यालय प्रमुख महेश चन्दले खेलकुद क्षेत्रले महिला सशक्तिकरणमा पुर्‍याउँदै आएको भूमिकाको उल्लेख गर्दै खेलकुद केवल प्रतिस्पर्धा मात्र नभई नेतृत्व, अनुशासन र सशक्तिकरणको माध्यम पनि भएको बताए । उनले टोलीलाई नगद २ हजार रुपैया सहयोग गरे । खेलप्रेमी समाजसेवी सोनु सिद्दिकीले खेलाडीहरूप्रति सहानुभूति र उत्साह व्यक्त गर्दै १३ वटा खेल पोशाक सहयोग गरे । उनले महिला खेलाडीहरूको उत्साह र मनोबल बढाउन आफू सधैं तयार रहेको बताए ।

कार्यक्रममा सहभागी खेलाडी शर्मिला केसीले सहयोग गर्ने सम्पूर्ण महानुभावहरूलाई आभार प्रकट गर्दै सबैबाट पाएको समर्थन र उत्साहले खेलाडीहरुको मनोबल उच्च बनाएको बताइन् । गण्डकी कपमा राम्रो प्रदर्शन गरेर सबैको विश्वास जित्ने उनको भनाई छ । लुम्बिनी प्रदेशको टोलीले गण्डकी कप प्रतियोगितामा उत्कृष्ट प्रदर्शन गर्ने अपेक्षा गरिएको छ । कार्यक्रमले खेलाडीहरूमा उत्साह, मनोबल र प्रदेशप्रतिको जिम्मेवारीको भावना थप मजबुत बनाएको देखिएको छ ।

प्रकाशित मिति: बुधबार, असार ११, २०८२ ०६:४६

प्रतिक्रिया दिनुहोस्