नेपालगञ्जमा आयोजित हजुरआमाहरु बीचको दौड प्रतियोगितामा धनसरा बुढा प्रथम

खेलकुद

गृहपृष्ठ
खेलकुद
नेपालगञ्जमा आयोजित हजुरआमाहरु बीचको दौड प्रतियोगितामा धनसरा बुढा प्रथम

नेपालगञ्जमा आयोजित हजुरआमाहरु बीचको दौड प्रतियोगितामा धनसरा बुढा प्रथम

शनिबार, भदौ २१, २०८२ बागेश्वरी पोस्ट

नेपालगञ्ज । नेपालगञ्जमा आयोजित हजुरआमाहरु बीचको दौड प्रतियोगितामा धनसरा बुढा प्रथम भएकी छिन् । दैनिक नेपालगञ्जको प्रकाशन संस्था सम्यक हब मिडिया प्रालिको आयोजना एवम् नाट्टा बाँके च्याप्टरको सह-आयोजनामा सम्पन्न 'दौडिन्छिन् हजुरआमा' अन्तर्गत आज विहान सम्पन्न हजुरआमाहरु बीचको दौड प्रतियोगितामा वीपी चोकदेखि धम्बोझी चोकसम्मको करीब एक किलोमिटर दुरी ५ मिनेट ४७ सेकेण्डमा पार गर्दै बुढा प्रथम भएकी हुन् ।

त्यस्तै नन्दमाया वली द्वितीय र रेवती सिंह तृतीय भइन् । वलीले ६ मिनेट ५ सेकण्ड तथा सिंहले ६ मिनेट १२ सेकेण्डमा उक्त दुरी पार गरेका थिए । यसमा ५० बर्ष पार गरेका हजुरआमाहरुबीच प्रतिष्पर्धा गराइएको थियो । प्रतियोगिताको उद्घाटन लुम्बिनी प्रदेशका खेलकुद मन्त्री सन्तोष पाण्डेले गरेका थिए । त्यस अवसरमा कर्णाली प्रदेश सरकारका अर्थ मन्त्री राजिव विक्रम शाह, लुम्बिनी प्रदेशसभा सदस्य अम्बिका काफ्ले, मिना श्रेष्ठ, नेपालगञ्ज उपमहानगरपालिकाका प्रमुख प्रशान्त विष्ट लगायत विशिष्ट अतिथिहरुको पनि उपस्थिति थियो ।

महिला सशक्तिकरण तथा स्वास्थ्यप्रतिको संवेदनशिलता र सक्रिय जीवनका लागि सचेतना जगाउने उद्देश्यले दौड आयोजना गरिएको सम्यक हब मिडिया प्रालिका प्रबन्ध निर्देशक झलक गैरेले बताए । आजै 'भन्छिन् हजुरआमा' शिर्षकमा हजुरआमा र विद्यार्थीबीच अन्तरपुस्ता संवाद पनि सम्पन्न गरिएको गैरेले जानकारी दिए ।

प्रकाशित मिति: शनिबार, भदौ २१, २०८२ २०:३१

प्रतिक्रिया दिनुहोस्