दोस्रो नेपालगञ्ज राष्ट्रिय स्विमिङ च्याम्पियनसिप सुरु

खेलकुद

गृहपृष्ठ
खेलकुद
दोस्रो नेपालगञ्ज राष्ट्रिय स्विमिङ च्याम्पियनसिप सुरु

दोस्रो नेपालगञ्ज राष्ट्रिय स्विमिङ च्याम्पियनसिप सुरु

शुक्रबार, कात्तिक १४, २०८२ बागेश्वरी पोस्ट

नेपालगञ्ज । नेपालगञ्जमा आजदेखि दोस्रो नेपालगञ्ज राष्ट्रिय स्विमिङ च्याम्पियनसिप सुरु भएको छ । दुई दिने प्रतियोगिताको आज विहान एक कार्यक्रमका बीच लुम्बिनी प्रदेश सरकारका युवा तथा खेलकुद मन्त्री सन्तोष पाण्डेले उद्घाटन गरे ।

नेपालगञ्ज स्विमिङ क्लबको आयोजनामा सुरु भएको प्रतियोगिताको उद्घाटन समारोहमा बोल्दै मन्त्री पाण्डेले पौडी खेलप्रति पछिल्लो समय नयाँ पुस्ताको आकर्षण बढ्दै गएको बताए । प्रदेश सरकारले पौडी खेलको विकासमा ध्यान दिने प्रतिबद्धता मन्त्री पाण्डेको छ । प्रतियोगिता संचालनका लागि लाग्ने कूल खर्चको २५ प्रतिशत आफ्नो मन्त्रालयले बेहोर्ने प्रतिबद्धता समेत उनले जनाए ।

उद्घाटन कार्यक्रम नेपालगञ्ज स्विमिङ क्लबका अध्यक्ष केशव न्यौपानेको अध्यक्षतामा सम्पन्न भएको थियो । वरिष्ठ उपाध्यक्ष एवम् प्रतियोगिता संयोजक सूर्यमणि अधिकारीले स्वागत मन्तव्य व्यक्त गर्नुभएको कार्यक्रममा लुम्बिनी प्रदेश सभा सदस्यद्वय रत्न खत्री र अम्बिका काफ्लेले पनि बोलेका थिए ।

उद्घाटन खेलमा ५० मिटर अण्डर ८ ब्याक स्टोक इमेन्टमा सगरमाथा स्वीमिङ क्लब ललितपुरका राजवीन जिरेल प्रथम, आदर्श माध्यमिक विद्यालय नेपालगञ्जका युभान श्रेष्ठ दोस्रो र कोशी प्रदेशका विष्णु पराजुली तेस्रो भए । त्यसैगरी २५ मिटर फ्रिस्टाइल अण्डर ८ ब्वाइजमा सगरमाथा क्लबका राजविन जिरेल प्रथम, शिखा एकेडेमी कोहलपुर बाँकेका दिप्सन पुन मगर दोस्रो र आदर्श मावि नेपालगञ्जका युभान श्रेष्ठ तेस्रो भएका छन् । त्यसैगरी २५ मिटर फ्रिस्टाइल अण्डर ८ गल्समा सगरमाथा क्लबका छियाना महर्जन प्रथम, आदर्श माविकी समृद्धि न्यौपाने दोस्रो र शिखा एकेडेमी कोहलपुरकी श्रीजा रेग्मीले तेस्रो स्थान हासिल गरेका छन् ।

२५ मिटर ब्याकस्ट्रोक अण्डर ८ गल्समा सगरमाथा क्लबकी छियाना महर्जन प्रथम, आदर्श माविकी समृद्धि न्यौपाने दोस्रो र शिखा एकेडेमीकी काफिया चलाउने तेस्रो भए । प्रतियोगिताका विजेता खेलाडीहरुलाई मन्त्री पाण्डेले मेडल तथा प्रमाणपत्र वितरण गरेका थिए । प्रतियोगितामा ८, १०, १२, १४, १७ मुनी र खुला समूह गरी विभिन्न उमेरका खेलाडीबीच २५ मिटरदेखि ४०० मिटरको दूरीमा ५६ वटा इभेन्ट्समा प्रतिष्पर्धा हुनेछ । प्रतियोगितामा देशभरका करीब १ सय ५० खेलाडी सहभागी भएको आयोजकले जनाएको छ ।

प्रकाशित मिति: शुक्रबार, कात्तिक १४, २०८२ १९:०१

प्रतिक्रिया दिनुहोस्