यु–१४ फुटबलः नेपालगञ्ज सेन्ट जेभियर्स, सिद्धार्थ विद्या सदन र कोहलपुर बागेश्वरी फाइनलमा प्रवेश

खेलकुद

गृहपृष्ठ
खेलकुद
यु–१४ फुटबलः नेपालगञ्ज सेन्ट जेभियर्स, सिद्धार्थ विद्या सदन र कोहलपुर बागेश्वरी फाइनलमा प्रवेश

यु–१४ फुटबलः नेपालगञ्ज सेन्ट जेभियर्स, सिद्धार्थ विद्या सदन र कोहलपुर बागेश्वरी फाइनलमा प्रवेश

सोमबार, कात्तिक २४, २०८२ बागेश्वरी पोस्ट

नेपालगञ्ज । नेपालगञ्जमा जारी यु–१४ फुटबल प्रतियोगिताको फाइनल समिकरण पूरा भएको छ । नेपालगञ्ज सेन्ट जेभियर्स स्कुलको छात्रा टिम बाँकेमा जारी एन्फा यु–१४ फुटबल प्रतियोगिताको फाइनलमा प्रवेश गरेको छ । नेपालगञ्ज रंगशालामा आज भएको खेलमा नेपालगञ्ज सेन्ट जेभियर्स टिमले वेष्टजोन हाईस्कुललाई २–० ले पराजित गरेको छ । नेपालगञ्ज सेन्ट जेभियर्सको जितमा कप्तान लक्ष्मी बुढा मगरले १०औं मिनेट र आकृति यादवले १६औं मिनेटमा गोल गरे । प्रतियोगिताको उपाधिको लागि नेपालगञ्ज सेन्ट जेभियर्सले होलिल्याण्ड स्कुलसँग प्रतिष्पर्धा गर्नेछ ।

यसैगरी छात्रतर्फको फाइनलमा सिद्धार्थ विद्या सदन नेपालगञ्ज र कोहलपुर बागेश्वरी इंग्लिश मिडियम स्कुलले प्रतिष्पर्धा गर्नेछन् । नेपालगञ्ज रंगशालामा आजै भएको सेमिफाइनलमा सिद्धार्थ विद्या सदनले एकतर्फी नतिजा निकाल्ने क्रममा ग्रीनपिस मावि कोहलपुरलाई ९–१ ले हराएको छ । सिद्धार्थको जितमा लेकराज भारतीले ह्याट्रिक गरे । उनले खेलको १५औं, ३०औं र ५०औं मिनेटमा गोल गरेका थिए । सिद्धार्थका अविशेष चौधरी र कमल परियारले २–२ गोल गरे ।

अविशेषले ४६औं मिनेट र ५०औं मिनेटमा गोल गरे । कमलले ३५औं र ४१औं मिनेटमा गोल गरेका थिए । खेलमा अर्पण बोहराले ४ मिनेट, विनायक हमालले ४३औं मिनेटमा गोल गरे । ग्रीनपिसका रोहनले सुरुआती २ मिनेटमै गोल गरेर टोलीलाई अग्रता दिलाएका थिए । तर, टोलीको अग्रता भने लामो समय टिक्न सकेन ।

अर्को खेलमा कोहलपुर बागेश्वरीले युनाइटेड एजुकेशनल एकेडेमीलाई १–० ले पराजित गर्दै फाइनलको यात्रा तय गरेको छ । कोहलपुर बागेश्वरीको जितमा सोहन जैसीले १०औं मिनेटमा गोल गरेका थिए । बाँके जिल्ला फुटबल संघको आयोजनामा भइरहेको प्रतियोगितालाई लुम्बिनी प्रदेश स्तरीय यु–१४ छनोट खेलका रुपमा लिइएको छ । उत्कृष्ट प्रदर्शन गर्ने खेलाडीहरुले प्रदेश स्तरीय प्रतियोगितामा बाँकेको प्रतिनिधित्व गर्ने अवसर पाउने बाँके जिल्ला फुटबल संघका अध्यक्ष भोजराज शाहीले बताए ।

प्रकाशित मिति: सोमबार, कात्तिक २४, २०८२ २०:४८

प्रतिक्रिया दिनुहोस्