फ्लडलाइटमुनि आजदेखि एनपीएलको दोस्रो संस्करण सुरू हुँदै

खेलकुद

गृहपृष्ठ
खेलकुद
फ्लडलाइटमुनि आजदेखि एनपीएलको दोस्रो संस्करण सुरू हुँदै

फ्लडलाइटमुनि आजदेखि एनपीएलको दोस्रो संस्करण सुरू हुँदै

सोमबार, मंसिर १, २०८२ बागेश्वरी पोस्ट

काठमाडौं । नेपाली क्रिकेटले आजदेखि इतिहासको नयाँ पाना पल्टाउन लागेको छ । पहिलोपटक नेपालमै फ्लडलाइटमुनि क्रिकेट खेलिनेछ र दर्शकका लागि प्याराफिटमा बसेर रातमै खेल हेर्न सकिने वातावरण बनेको छ । धेरै वर्षदेखि राखिएको चाहनालाई क्यानले आखिर पूरा गर्न सफल भएको छ ।

नेपाल प्रिमियर लिग (एनपीएल) को दोस्रो संस्करण सुरू हुँदै गर्दा खेलाडीदेखि क्यानका पदाधिकारी र सर्वसाधारण समर्थक सबै यो क्षणका साक्षी बन्न तयारी अवस्थामा छन् । पहिलो संस्करणमा सबै खेल दिनमै सीमित भए पनि यसपटक निर्धारण गरिएका ३२ खेलमध्ये २३ वटा डे–नाइट हुनेछन् ।

आइतबार मात्रै क्यानले फ्लडलाइट र प्यारापिट स्थायी रूपमा हस्तान्तरण पाएको हो । अब गत संस्करणको विजेता जनकपुर बोल्ट्स सोमबार काठमान्डु गोर्खाजसँग भिड्दै नयाँ बत्तीको उज्यालोमै उपाधि रक्षा अभियान सुरू गर्नेछ ।

यस पटक पनि लिगमा कुल आठ फ्रेन्चाइज टोली सहभागी छन् । जसमा डिफेन्डिङ च्याम्पियन जनकपुर बोल्ट्स, उपविजेता सुदूरपश्चिम रोयल्स, कर्णाली याक्स, चितवन राइनोज, काठमान्डु गोर्खाज, विराटनगर किङ्स, पोखरा एभेन्जर्स, लुम्बिनी लायन्स रहेका छन् ।

फ्लडलाइटसहितको यो संस्करण नेपाली क्रिकेटका लागि माइलस्टोन सावित हुने अपेक्षा गरिएको छ ।

प्रकाशित मिति: सोमबार, मंसिर १, २०८२ ११:०९

प्रतिक्रिया दिनुहोस्