११औं धारा नेपालगन्ज म्याराथनको तयारी पूरा, विजेतालाई दुई लाख पुरस्कार

खेलकुद

गृहपृष्ठ
खेलकुद
११औं धारा नेपालगन्ज म्याराथनको तयारी पूरा, विजेतालाई दुई लाख पुरस्कार

११औं धारा नेपालगन्ज म्याराथनको तयारी पूरा, विजेतालाई दुई लाख पुरस्कार

बुधबार, मंसिर ३, २०८२ बागेश्वरी पोस्ट

नेपालगन्ज । ११औं धारा नेपालगन्ज म्याराथनको तयारी पूरा भएको छ । नेपालगन्जमा आज आयोजित पत्रकार सम्मेलनमा धारा नेपालगन्ज म्याराथनका संस्थापक टीएस ठकुरीले मंसिर ६ गते हुने प्रतियोगिताको तयारी पूरा भएको जानकारी दिए । प्रतियोगिताका विजेताले दुई लाख रुपैयाँ पुरस्कर पाउने भएका छन् । महिलातर्फकाे हाफ म्याराथन विजेतालाई ७५ हजार रुपैयाँ पुरस्कार राखिएकाे छ । धारा नेपालगन्ज म्याराथनका संस्थापक ठकुरीका अनुसार, म्याराथनमा दाेस्राेलाई १ लाख, तेस्राेलाई ५० हजार, चाैथाेलाई २५ हजार, पाँचाैलाई १५ हजार, छैठाैंलाई १० हजार पुरस्कार राखिएकाे छ । शीर्ष दश स्थानसम्म र दाैड पूरा गर्ने सबैलाई ५ हजार नगद पुरस्कार दिइनेछ ।

४५ वर्षमाथिकाे भेट्रान दाैडकाे शीर्ष तीन जनालाई क्रमशः २५ हजार, १५ हजार र १० हजार पुरस्कार राखिएकाे छ । महिला हाफ म्याराथानमा दाेस्राेलाई ५० हजार, तेस्राेलाई २५ हजार, चाैथाेलाई १५ हजार र पाँचाैलाई १० हजार पुरस्कार राखिएकाे छ । १० किलाेमिटर खुल्ला पुरुष तथा महिलातर्फका शीर्ष तीन जनालाई क्रमश: २५ हजार, १५ हजार र १० हजार पुरस्कार राखिएकाे छ । ५ किलाेमिटर स्कुल स्तरीय छात्र एवं छात्रा दाैडका शीर्ष तीन जनालाई क्रमशः ५ हजार, ३ हजार र २ हजार, ह्वीलचियरतर्फका तीन जनालाई ५ हजार, ३ हजार र २ हजार, किड्स रनका सम्पूर्णलाई नगद तथा कर्पाेरेट रन तर्फका शीर्ष तीन जनालाई पदक, प्रमाणपत्र र सरप्राइज उपहार प्याकेज प्रदान गर्ने रेस डाइरेक्टर चन्द्रबहादुर गुरुङले जानकारी दिए ।

म्याराथनमा यसपालीदेखि एक स्कुललाई 'नेपालगन्ज ट्रफी' प्रदान गरिने, म्याराथनमा राेमान्चकता थप्न फाेटाे सम्बन्धि फिपिक्स कार्यक्रम कार्यान्वयनकाे तयारी गरिएकाे छ । यसैबीच, म्याराथन अघि नेपालगन्ज कनक्लेव हुने भएकाे छ । कनक्लेवका निर्देशक जनक नेपालका अनुसार, कनक्लेवमा महानायक राजेश हमाल, मिस नेपाल वल्र्ड २०२५ लुना लुइँटेल, मिस नेपाल वल्र्ड २०२३ सृच्छा प्रधान, जेनजी लिडर रक्षा बम, साहित्यकार सुविन भट्टराई, डा. नवराज केसी लगायत वक्ता रहेका छन् । उनीहरु नेपालगन्ज कनक्लेबका विभिन्न सत्रका बक्ताका रुपमा रहनेछन् । कनक्लेबमा महानगर एक सपनाः उदाउँदो र पुरानो सहर जोड्ने प्रयास, खेलकुदले जोड्छ देश, जेनजी विद्रोहपछिको नेपालः अन्योल र अवसर, नेपालगञ्जः आर्थिक राजधानीको नारा र सम्भावना, युगदेखि युगसम्मका महानायक, डिजिटल युगको दोधारः प्रविधि वरदान कि अभिशाप, फाइनप्रिन्ट फिवर, ७७७ च्यालेन्ज डकुमेन्ट्री प्रदर्शन समेत गरिने कनक्लेबका निर्देशक नेपालले जानकारी दिए ।

प्रकाशित मिति: बुधबार, मंसिर ३, २०८२ १८:१८

प्रतिक्रिया दिनुहोस्