नेपालगञ्जमा प्राइमोको शेयर कारोवार सुरु

अर्थ

गृहपृष्ठ
अर्थ
नेपालगञ्जमा प्राइमोको शेयर कारोवार सुरु

नेपालगञ्जमा प्राइमोको शेयर कारोवार सुरु

शनिबार, मंसिर १३, २०८२ बागेश्वरी पोस्ट

नेपालगञ्ज । धितोपत्र बोर्डको ब्रोकर कार्यालयको सङ्ख्या नेपालगञ्जमा तीन पुगेको छ । पछिल्लोपटक प्राइमो सेक्युरिटिज प्रालिले पनि नेपालगञ्जमा आफ्नो शेयर बजार सम्वन्धि कारोवार सुरु गरेपछि धितोपत्र बोर्डको ब्रोकर कार्यालयको सङ्ख्या तीन पुगेको हो । प्राइमोले यहाँका लगानीकर्तासँग साक्षात्कार गर्दै शेयर बजारको अवस्था र आफ्ना सेवावारे जानकारी दिएको छ ।

सो अवसरमा प्राइमोका संस्थापक सञ्चालक विजय बहादुर शाहले नेपालगञ्ज आर्थिक क्षेत्रका हिसाबले चलायमान शहर भएकाले यस क्षेत्रमा शेयर बजारको सम्भावना रहेको बताए । उनले शेयर बजारका सम्भावना र चुनौतीबारे जानकारी दिँदै बाँके र बर्दियाका लगानीकर्ता यसबाट लाभान्वित हुने विश्वास व्यक्त गरे । प्रालिका प्रमुख कार्यकारी अधिकृत मेघनाथ उपाध्यायले ब्रोकर कार्यालयबाट हुने सेवा प्रवाहलाई प्रभावकारी बनाउने विषयमा धारणा राख्दै लगानीकर्ताले राखेका जिज्ञासाको उत्तर दिएका थिए ।

शेयर बजारका लगानीकर्ता अर्जुन सुवेदी, विकास भट्टराई, पुष्प प्रधान, जीवनारायण वेल्बासे लगायतले वित्तीय साक्षरता कक्षा सञ्चालन गर्न आग्रह गरे । वि.सं. २०५० साल माघ १ गतेदेखि शेयर बजार सम्वन्धि कारोवार गरेको प्राइमोले तेस्रो शाखाका रुपमा यो कार्यालय स्थापना गरेको हो । यसअघि नेपालगञ्जमा इम्पेरियल र कालिका सेक्युरिटिज प्रालिले धितोपत्र बोर्डको ब्रोकर कार्यालय स्थापना गरेर शेयर बजार सम्बन्धि कारोवार गर्दै आएका छन् ।

नेपालगञ्जमा स्थापना भएका ब्रोकर कार्यालयमा दाङ, सल्यान, बर्दिया, सुर्खेत लगायतका जिल्लाबाट शेयर कारोवारका लागि लगानीकर्ता आउने गर्छन् । नेपालगञ्जको शेयर बजारमा लगानीकर्ताले रु. १ करोडदेखि ५ करोडसम्म दैनिक लगानी गर्दै आएको बताइएको छ ।

प्रकाशित मिति: शनिबार, मंसिर १३, २०८२ २०:००

प्रतिक्रिया दिनुहोस्