मेयर कप राष्ट्रिय साइकल दौड प्रतियोगिताको तयारी पूरा

खेलकुद

गृहपृष्ठ
खेलकुद
मेयर कप राष्ट्रिय साइकल दौड प्रतियोगिताको तयारी पूरा

मेयर कप राष्ट्रिय साइकल दौड प्रतियोगिताको तयारी पूरा

बिहीबार, मंसिर १८, २०८२ बागेश्वरी पोस्ट

नेपालगञ्ज । मंसिर २० गते शनिबार नेपालगञ्जमा हुने आठौं मेयर कप राष्ट्रिय साइकल दौड प्रतियोगिता २०८२ को तयारी पूरा भएको छ । नेपालगञ्ज साइक्लिङ्ग क्लबले नेपालगञ्ज उपमहानगरपालिकाको सहयोगमा प्रतियोगिता गर्न लागेको हो । नेपालगञ्जमा आज पत्रकार सम्मेलन गरेर प्रतियोगिताको तयारी पूरा भएको जानकारी दिइएको हो ।

नेपालगञ्ज साइक्लोथन आठौं मेयर कप साइकल दौड प्रतियोगितामा देशभरबाट १३० बढी महिला तथा पुरुष खेलाडीहरुले सहभागिता जनाउने क्लबका अध्यक्ष प्रदिप सापकोटाले जानकारी दिए । प्रतियोगिता विभिन्न पाँच विधामा आयोजना हुनेछ । एक विधामा राष्ट्रिय स्तरका खेलाडीहरुले भाग लिँदैछन् । जस अन्तर्गत एमटिबी पुरुष ३६ किमी, एमटिबी भेट्रान २५ किमी, ःएमटिबी महिला २५ किमी, साधारण साइकल पुरुष २५ किमी, साधारण साइकल महिला १६ किमीको हुने प्रतियोगिताका संयोजक एवम् नेपालगञ्ज साइक्लिङ्ग क्लबका उपाध्यक्ष कविराम बुढाथोकीले बताए ।

प्रतियोगिता नेपालगञ्ज विपी चोकबाट शनिबार विहान सुरु हुनेछ । प्रतियोगिताको रुट नेपालगञ्ज विपी चोकबाट धम्बोजी, राँझा, हवलदारपुर, कोहलपुर हुँदै पुनः सोही रुटबाट विपी चोकसम्मको हुनेछ । विजेता खेलाडीहरुलाई नगद पुरस्कार, मेडल र प्रमाणपत्रसहित अन्य पुरस्कारहरु प्रदान गरिने अध्यक्ष सापकोटाले बताए । प्रथम पुरस्करको राशी २५ हजार नगद रहेको सापकोटाले जानकारी दिए । द्वितियलाई १५ हजार र तृतियलाई १० हजार पुरस्कार राखिएको छ । यो बिधामा राष्ट्रिय खेलाडीसहित १९ जनाले प्रतिस्पर्धा गर्दैछन् ।

२५ किलोमिटरको एमटीबी खुल्ला महिलातर्फ ८ जना सहभागी हुँदैछन् । यो बिधामा प्रथमलाई २० हजार, द्वितियलाई १५ हजार र तृतियलाई १० हजार पुरस्कार राखिएको छ । ४५ वर्षमाथिकालाई समेटिएको एमटीबी मास्टरका विजेतालाई १५ हजार, २० हजार र ७ हजार पुरस्कार राखिएको छ। २५ किलोमिटरको यो बिधामा १६ जनाले प्रतिष्पर्धा गर्दैछन् । सापकोटाले नेपालगञ्ज उपमहानगरपालिकाको २ लाख ७५ हजार सहयोगमा प्रतियोगिता आयोजना गरिएको बताए । उनले प्रतियोगितामा ३ लाख ३५ हजार खर्च हुने अनुमान गरिएको जानकारी दिए । पत्रकार सम्मेलनमा नेपाल पत्रकार महासंघ बाँकेका अध्यक्ष नवीन गिरी लगायतको उपस्थिति थियो ।

आज भन्दा करिब आठ वर्ष पहिला गठन गरी जिल्ला खेलकुद संघमा समेत आवद्ध भएको नेपालगञ्ज साइक्लिङ्ग क्लब पश्चिम नेपालको साइक्लिङ्ग चेनमार्फत स्वास्थ्य, खेलकुद, पर्या्पर्यटनका साथै विकास प्रवद्धन गर्ने एक सशक्त क्लबका रुपमा परिचित छ । क्लबले साइक्लिङ्गमार्फत गुमनाम र गुल्जार नभएका पर्यटकीय गन्तव्यहरुको खोजी गर्दै व्यापक प्रचारप्रसार गर्दै पुनर्जीवित गर्न महत्वपूर्ण भूमिका खेलेको छ । यस क्षेत्र र छिमेकी जिल्लाको पर्यटकीय स्थलहरुको दृश्यावलोकन गर्न र सम्भावनाहरुको व्यापक खोजी गर्दै आमरुपमा पर्यटन प्रवर्द्धन गर्ने ध्येय अनुसार वि.सं. २०७५ देखि क्लबले टुर डे ठाकुरद्वारा साइक्लिङ्ग यात्रा पनि निरन्तर गरिरहेको छ ।

प्रकाशित मिति: बिहीबार, मंसिर १८, २०८२ १९:३०

प्रतिक्रिया दिनुहोस्