८औँ राष्ट्रपति रनिङ शिल्ड तथा नेपालगन्ज मेयर कपको तयारी पूरा

खेलकुद

गृहपृष्ठ
खेलकुद
८औँ राष्ट्रपति रनिङ शिल्ड तथा नेपालगन्ज मेयर कपको तयारी पूरा

८औँ राष्ट्रपति रनिङ शिल्ड तथा नेपालगन्ज मेयर कपको तयारी पूरा

बिहीबार, पुस १०, २०८२ बागेश्वरी पोस्ट

नेपालगन्ज । नेपालगन्जमा भोलि शुक्रबारदेखि आयोजना गरिएको ८औँ राष्ट्रपति रनिङ शिल्ड खेलकुद प्रतियोगिता तथा मेयर कप खेलकुद प्रतियोगिताको सम्पूर्ण तयारी पूरा भएको हो । नेपालगन्ज उपमहानगरपालिकाको आयोजना तथा प्याब्सन नेपालगन्जको व्यवस्थापनमा प्रतियोगिता सञ्चालन हुन लागेको हो । प्रतियोगिताको लुम्विनी प्रदेश सामाजिक विकास मन्त्री जन्मजय तिमिल्सेनाले उद्घाटन गर्ने कार्यक्रम रहेको प्याब्सन नेपालगन्जका सचिव विज्ञान शाहले जानकारी दिए ।

उद्घाटन अघि नेपालगन्जमा प्रभातफेरी निकालिनेछ । प्रतियोगितामा नेपालगन्ज उप–महानगरपालिका क्षेत्रभित्र रहेका सम्पूर्ण आधारभूत तथा माध्यमिक तहका विद्यालयका विद्यार्थीहरु सहभागी हुन सक्नेछन् । प्रतियोगिता नेपालगन्ज रंगशालामा हुनेछ । १४ गतेसम्म चल्ने प्रतियोगितामा सहभागी विद्यार्थीको उमेर मापदण्ड अनुसार आधारभूत तहका लागि २०६८ बैशाख १ गतेपछि जन्मिएका तथा माध्यमिक तहका लागि २०६५ बैशाख १ गतेपछि जन्मिएका विद्यार्थी प्रतिस्पर्धाका लागि योग्य हुने मापदण्ड बनाइएको छ । सहभागी हुन विद्यार्थीको जन्मदर्ता प्रमाणपत्र र इमिस कोडसहितको परिचयपत्र अनिवार्य गरिएको छ ।

खेलकुद अन्तर्गत आधारभूत तहमा २०० मिटर, ४०० मिटर, ८०० मिटर, १५०० मिटर दौड, रिले दौड, लङ्गजम्प र सटपुट समावेश गरिएको छ । यस्तै माध्यमिक तहमा एथ्लेटिक्स, भलिबल, कबड्डी, कराँते, तेक्वान्दो र उसु प्रतियोगिता सञ्चालन गरिनेछ । प्रतियोगिताको मूल्याङ्कन मापदण्ड अनुसार प्रथम, द्वितीय र तृतीय हुने खेलाडी तथा विद्यालयलाई अंक प्रदान गरिनेछ । निजी विद्यालयका लागि प्रवेश शुल्क निर्धारण गरिएको छ भने खेलाडी परिवर्तन तथा प्रोटेस्ट शुल्क समेत तोकिएको नेपालगन्ज उपमहानगरपालिका शिक्षा महाशाखाका शिक्षा अधिकृत डिल्ली आचार्यले जानकारी दिए ।

माध्यमिक तहमा ५० र आधारभूत तहमा ५१ वटा विद्यालयका छात्र छात्राहरूले प्रतिस्पर्धा गर्दैछन् ।

प्रकाशित मिति: बिहीबार, पुस १०, २०८२ १८:४९

प्रतिक्रिया दिनुहोस्