नेपालगन्जमा आठौं राष्ट्रपति रनिङ शिल्ड तथा मेयर कप खेलकुद प्रतियोगिता सुरु

खेलकुद

गृहपृष्ठ
खेलकुद
नेपालगन्जमा आठौं राष्ट्रपति रनिङ शिल्ड तथा मेयर कप खेलकुद प्रतियोगिता सुरु

नेपालगन्जमा आठौं राष्ट्रपति रनिङ शिल्ड तथा मेयर कप खेलकुद प्रतियोगिता सुरु

बाँके खेलकुदको उर्वर भूमि: मन्त्री तिमिल्सेना

शुक्रबार, पुस ११, २०८२ बागेश्वरी पोस्ट

नेपालगन्ज । लुम्विनी प्रदेशका सामाजिक विकास मन्त्री जन्मजय तिमिल्सेनाले बाँके खेलकुदको उर्वर भूमि भएको बताएका छन् । आठौं राष्ट्रपति रनिङ शिल्ड खेलकुद तथा मेयर कप खेलकुद प्रतियोगिताको आज नेपालगन्जमा उद्घाटन गर्दै उनले यस्ता प्रतियोगिताले नयाँ प्रतिभाहरुको उजागर हुने बताए । उनले खेलकुदलाई प्रविधिसँग जोड्न सकियो भने त्यसले यस क्षेत्रको पहिचान स्थापित गर्ने धारणा समेत व्यक्त गरे ।

मन्त्री तिमिल्सेनाले सामाजिक विकास मन्त्रालयले खेलकुद र शिक्षालाई पहिलो प्राथमिकता दिएर काम गर्दै आएको पनि बताए । प्रतियोगिताबाट उत्कृष्ट हुने खेलाडीहरुले प्रदेशकै प्रतिनिधित्व गर्ने भएकाले निष्पक्ष भएर खेलाडी छनौट गर्न पनि उनले निर्देशन दिए ।

नेपालगन्जका नगर प्रमुख प्रशान्त विष्टले खेलकुद नेपालगन्जको पहिचान भएको बताए । उनले नेपालगन्जका थुप्रै खेलाडीहरुले राष्ट्रिय तथा अन्तर्राष्ट्रिय स्तरमा प्रदर्शन गरेर नेपालगन्जको पहिचान दिलाएको उल्लेख गरे । खेलकुदका गतिविधिहरुलाई चलायमान गराउन विद्यालयले पनि खेलकुदलाई प्राथमिकता दिनुपर्ने उनको भनाई छ । बाँकेका प्रमुख जिल्ला अधिकारी दिल कुमार तामाङले खेलकुदले युवाहरुलाई अनुशासित बनाउने बताए ।

नेपालगन्ज उपमहानगरपालिकाको आयोजना तथा प्याब्सन नेपालगन्जको व्यवस्थापनमा प्रतियोगिता संचालन भएको हो । १४ गतेसम्म चल्ने प्रतियोगितामा उपमहानगरका माध्यमिक तहका ५० र आधारभूत तहका ५१ वटा विद्यालयका छात्र-छात्राहरूले प्रतिस्पर्धा गर्ने प्याब्सन नगर सचिव विज्ञान शाहले बताए । नेपालगन्ज रंगशालामा सुरु भएको प्रतियोगिता उद्घाटन अघि वीपी चोकबाट वृहत् प्रभातफेरी निकालिएको थियो ।

प्रकाशित मिति: शुक्रबार, पुस ११, २०८२ १८:२२

प्रतिक्रिया दिनुहोस्