नेपालगञ्जमा चौथो खुला व्यायाम प्रतियोगिता सम्पन्न

खेलकुद

गृहपृष्ठ
खेलकुद
नेपालगञ्जमा चौथो खुला व्यायाम प्रतियोगिता सम्पन्न

नेपालगञ्जमा चौथो खुला व्यायाम प्रतियोगिता सम्पन्न

आइतबार, पुस १३, २०८२ बागेश्वरी पोस्ट

नेपालगञ्ज । नेपालगञ्जमा चौथो खुला व्यायाम प्रतियोगिता सम्पन्न भएको छ । एनवाईएफसी (NYFC) नेपालगञ्जको आयोजना, नेपालगञ्ज उपमहानगरपालिका एवम् नेपालगञ्ज वडा नम्बर १ को सहयोग र सहकार्य तथा बीबी ग्रुपको मुख्य प्रायोजन र घोराही सिमेन्ट्सको सहप्रायोजनमा प्रतियोगिता सम्पन्न भएको हो । प्रतियोगिता उद्घाटन कार्यक्रम नेपालगञ्ज उपमहानगरपालिकाका नगर प्रमुख प्रशान्त बिष्टको प्रमुख आतिथ्यता तथा नेपालगञ्ज उपमहानगरपालिका वडा नम्बर १ का अध्यक्ष प्रमोद रिजालको विशिष्ट आतिथ्यतामा सम्पन्न भएको हो । युवाहरूलाई शारीरिक, मानसिक र सामाजिक रूपमा सशक्त बनाउने उद्देश्यले व्यायाम र खेलकुदको महत्वलाई विशेष जोड दिन प्रतियोगिता आयोजना गरिएको बताइएको छ । प्रतियोगितामा मेल ओपन सर्किट, फिमेल ओपन सर्किट र ओपन बारमा प्रतिष्पर्धा गराइएको थियो ।

प्रतियोगितामा मेल ओपन सर्किटतर्फ विशाल गिरी प्रथम, विवेक थापा दोस्रो र ललित शाही तृतीय भए । यस्तै फिमेल ओपन सर्किटतर्फ रज्जु महर्जन प्रथम, दोस्रो रोजिता लामा र तेस्रो रचना राना मगर भए । ओपन बारतर्फ भने प्रथम शिवराज ढकाल, दोस्रो सञ्जोग थापा र तेस्रो ललित शाही भए । प्रथम, द्वितीय र तृतीय भएकाहरुलाई क्रमशः २०, १५ र १० हजार रुपैयाँ पुरस्कार प्रदान गरिएको थियो । साथै विभिन्न प्रायोजकहरूबाट गिफ्ट ह्याम्पर, प्रमाणपत्र, मेडल र ट्रफी समेत प्रदान गरिएको थियो । यसका साथै प्रतियोगितामा फन रन, टोल टोलमा फिटनेश जस्ता विशेष कार्यक्रम पनि सञ्चालन गरिएका थिए । प्रतियोगितामा स्पिरिट अफ द गेम अवार्ड अन्तर्गत सर्किट मेलतर्फ सागर विश्वकर्मा र सर्किट फिमेलतर्फ मुस्कान अग्रवाल चयन भए । प्रतियोगिताका निर्णायक मण्डलमा युवराज बस्नेत, सुरज डंगोल, विश्वराज तामाङ घिसिङ र क्षितिज सिंह क्षेत्री रहेका थिए ।

प्रकाशित मिति: आइतबार, पुस १३, २०८२ २१:२६

प्रतिक्रिया दिनुहोस्