बाँकेमा विश्व क्षयरोग दिवस मनाइयो

स्वास्थ्य

गृहपृष्ठ
स्वास्थ्य
बाँकेमा विश्व क्षयरोग दिवस मनाइयो

बाँकेमा विश्व क्षयरोग दिवस मनाइयो

मंगलबार, चैत १०, २०८२ बागेश्वरी पोस्ट

नेपालगञ्ज । “हो, हामी क्षयरोग अन्त्य गर्छौं राष्ट्रिय अभियान, हाम्रो योगदान” भन्ने मूल नाराका साथ बाँकेमा विश्व क्षयरोग दिवस विविध कार्यक्रमका साथ मनाइएको छ ।

नेपाल क्षयरोग निवारण संस्था बाँकेको आयोजनामा सम्पन्न कार्यक्रममा अन्तरक्रिया, कार्यपत्र प्रस्तुति तथा निबन्ध प्रतियोगिताका विजेताहरूलाई पुरस्कार तथा प्रमाणपत्र वितरण गरिएको थियो । निबन्ध प्रतियोगितामा होलील्याण्ड माध्यमिक विद्यालयकी छात्रा स्वस्तिका यादव प्रथम, भेरी इङ्ग्लिस मिडियम स्कुलकी वर्षा श्रेष्ठ द्वितीय र धम्बोझी माध्यमिक विद्यालयकी गायत्री ऐडी तृतीय भएकी थिइन् । त्यसैगरी सरस्वती माध्यमिक विद्यालयकी कौशकी भाट र नारायण माध्यमिक विद्यालयका ललित पुन मगरले सान्त्वना स्थान हासिल गरेका थिए । विजेताहरूलाई पुरस्कार तथा प्रमाणपत्र प्रदान गरिएको थियो ।

कार्यक्रमकी प्रमुख अतिथि लुम्बिनी प्रदेश सभा सदस्य मीना श्रेष्ठले संस्थाले क्षयरोग नियन्त्रण तथा रोकथामका क्षेत्रमा गर्दै आएको कार्य सराहनीय रहेको बताउँदै आगामी दिनमा समेत निरन्तर सहयोग रहने विश्वास ब्यक्त गरिन् । दिवसको अवसरमा क्षयरोगबारे जनचेतना अभिवृद्धि गर्ने उद्देश्यले नेपालगञ्जका मुख्य चोकहरूमा सन्देशमूलक ब्यानर टाँस गरिएको थियो । संस्थाका सभापति जनकराम भण्डारीको अध्यक्षतामा सम्पन्न कार्यक्रममा शिक्षक नायकको तर्फबाट भवनियापुर माविका शिक्षक मनोजराजा श्रीवास्तवले विद्यालयस्तरबाट क्षयरोग सम्बन्धि सचेतना फैलाउन निरन्तर प्रयास भइरहेको जानकारी दिए ।

कार्यक्रममा स्वागत मन्तव्य संस्थाका सदस्य प्रहलाद विश्वकर्माले राखेका थिए भने सञ्चालन सचिव बसन्त लामिछानेले गरेका थिए । कार्यक्रममा विभिन्न सरकारी तथा गैरसरकारी संघसंस्थाका प्रतिनिधिहरूको सहभागिता रहेको थियो ।

प्रकाशित मिति: मंगलबार, चैत १०, २०८२ २१:०९

प्रतिक्रिया दिनुहोस्