युनाइटेडका कक्षा १२ का विद्यार्थीको बिदाई

शिक्षा

गृहपृष्ठ
शिक्षा
युनाइटेडका कक्षा १२ का विद्यार्थीको बिदाई

युनाइटेडका कक्षा १२ का विद्यार्थीको बिदाई

शनिबार, चैत २८, २०८२ बागेश्वरी पोस्ट

नेपालगञ्ज । नेपालगञ्ज-१२ मुक्तिपुरस्थित युनाइटेड एजुकेशनल एकेडेमीले कक्षा १२ का विद्यार्थीहरूलाई विदाई कार्यक्रम भव्य रूपमा सम्पन्न गरेको छ । कार्यक्रमको अध्यक्षता कक्षा ११ का विद्यार्थी मिथिलेश बर्माले गरेका थिए भने राष्ट्रिय परीक्षा बोर्ड कोहलपुर कार्यालयका प्रमुख प्रकाश शाही प्रमुख अतिथि थिए ।

शाहीले कक्षा १२ जीवनको महत्वपूर्ण मोड भएको उल्लेख गर्दै परीक्षालाई आत्मविश्वासका साथ सामना गर्न आग्रह गरे । उनले भने, “जीवनमा सफलता पाउन मेहनत, धैर्य र स्पष्ट लक्ष्य आवश्यक हुन्छ । विद्यार्थीहरूले सकारात्मक सोच र निरन्तर अभ्यासलाई आफ्नो बानी बनाउनुपर्छ ।”

कार्यक्रममा प्रबन्ध निर्देशक विकास बज्राचार्य, प्रिन्सिपल जीवराज भण्डारी तथा +२ निर्देशक गणेश प्रसाद पाठक लगायतले विद्यार्थीहरूको भविष्य उज्ज्वल रहेको उल्लेख गर्दै सफलता हासिल गर्न निरन्तर मेहनत र अनुशासन आवश्यक रहेको बताए ।

शैक्षिक अभियन्ता तथा मोटिभेटर क्षेत्र प्रसाद ज्ञवालीले प्रेरणादायी मन्तव्य राख्दै असफलतालाई सिकाइको अवसरका रूपमा लिन सुझाव दिए । उनले भने, “असफलताबाट डराउनु हुँदैन, त्यसलाई सिक्ने अवसरका रूपमा लिनुपर्छ । ठूलो सपना देख्नुस् र त्यसलाई पूरा गर्न दृढताका साथ अघि बढ्नुस् । ”

कार्यक्रममा विद्यार्थीहरूले विभिन्न सांस्कृतिक प्रस्तुति (एकल एवम् सामूहिक नृत्य) प्रस्तुत गरी वातावरणलाई रमाइलो बनाएका थिए । त्यस अवसरमा नेपाल पत्रकार महासंघ बाँकेका अध्यक्ष नवीन गिरी लगायत अतिथिहरुको उपस्थिति थियो ।

प्रकाशित मिति: शनिबार, चैत २८, २०८२ २०:५२

प्रतिक्रिया दिनुहोस्