नाइजेरियन जोन क्लबले जित्यो प्रथम खजुरा गोल्डकपको उपाधि

खेलकुद

गृहपृष्ठ
खेलकुद
नाइजेरियन जोन क्लबले जित्यो प्रथम खजुरा गोल्डकपको उपाधि

नाइजेरियन जोन क्लबले जित्यो प्रथम खजुरा गोल्डकपको उपाधि

आइतबार, वैशाख ६, २०८३ बागेश्वरी पोस्ट

नेपालगन्ज । प्रथम खजुरा गोल्डकपको उपाधि विदेशी टोली नाइजेरियन जोन क्लबले जितेको छ । आइतबार सम्पन्न फाइनल खेलमा अर्को विदेशी टोली जेविएम फूटबल एकेडेमी लखनउलाई ४–० गोल अन्तरले स्तब्ध पार्दै नाइजेरियन क्लब ‘एम्टी एरिना’ प्रथम खजुरा गोल्डकप फुटबल प्रतियोगिताको उपाधि उचाल्न सफल भएको हो । उपाधिसंगै नाइजेरियन टोलीले नगद ७ लाख हात पार्दा उपविजेता लखनउ टिमले नगद ४ लाखमै चित्त बुझायो । खजुरा-४ डि-गाउँस्थित मिनी रंगशालामा प्रतियोगिता संचालन गरिएको थियो ।

सबै गोल दोस्रो हाफको अन्तिम समयमा भएका थिए । नाइजेरियाको जितमा कलव कोनले दुई गोल गरे । यसैगरी एडवार्ड थोमस र ओलावी अफीजले एक एक गोल गरेका थिए । पहिलो हाफ निकै प्रतिष्पर्धात्मक भए पनि दोस्रो हाफको मध्यतिर नाइजेरियन टोली लखनउमाथि हाबी भएको थियो । प्रतियोगितामा नाइजेरियाका गोल रक्षक लेकन शितु, उत्कृष्ट रक्षक र म्यान अफ दि म्याच बिल्गो वी तथा एडवार्ड थोमस प्लेयर अफ दि पिस घोषित भए । यसैगरी जेविएम लखनउका क्षितिज मगर उत्कृष्ट मिडफिल्डर र फोर ब्रदर्श एफसी नवलपरासीका नवीन महतो सर्बाधिक गोलकर्ता बने । उत्कृष्ट खेलाडीहरुलाई खजुरा गाउँपालिकाका अध्यक्ष डम्बर बहादुर विक, उपाध्यक्ष मञ्जु मल्ल लगायतले पुरस्कृत गरेका थिए ।
न्यू डाँफे स्पोर्ट्स क्लबको आयोजनामा चैत ३० गतेदेखि प्रतियोगिता सुरु भएको थियो । प्रतियोगिता नकआउट आधारमा खेलाइएको हो । प्रतियोगितामा आयोजक न्यू डाँफे स्पोर्ट्स क्लबसहित जेविएम फुटबल एकेडेमी लखनउ, काँक्रेविहार क्लब सुर्खेत, फोर ब्रदर्श एफसी नवलपरासी, एपीएफ काठमाडौँ र नाइजेरियन जोन क्लब नाइजेरिया गरी ८ टोलीको सहभागिता रहेको प्रतियोगिताका प्रचार संयोजक खगेन्द्र दाहालले बताए ।

प्रतियोगिताका विजेता टिमले विजेता पुरस्कार खजुराबासी हाल अमेरिका निवासी लिलबहादुर थापाको सौजन्यमा प्रदान गरिएको हो । वैदेशिक रोजगारीका सिलसिलामा हाल अमेरिकामा रहेका स्थानीय लिलबहादुर थापाले व्यक्तिगत रूपमा उक्त रकम सहयोग गरेको आयोजक न्यू डाँफे स्पोर्ट्स क्लबका अध्यक्ष बालाराम खत्रीले बताए । प्रतियोगिताका सञ्चालनका लागि खजुरा गाउँपालिका, लुम्बिनी प्रदेश खेलकुद परिषद्, एम्टी एरिना लगायतले आर्थिक सहयोग गरेको आयोजकले जनाएको छ ।

प्रकाशित मिति: आइतबार, वैशाख ६, २०८३ २०:२९

प्रतिक्रिया दिनुहोस्