खजुरामा वैशाख २७ देखि प्रथम अशोक स्मृति कप

खेलकुद

गृहपृष्ठ
खेलकुद
खजुरामा वैशाख २७ देखि प्रथम अशोक स्मृति कप

खजुरामा वैशाख २७ देखि प्रथम अशोक स्मृति कप

शनिबार, वैशाख १९, २०८३ बागेश्वरी पोस्ट

नेपालगञ्ज । बाँकेको खजुरामा प्रथम अशोक स्मृति कप फुटबल प्रतियोगिता २०८३ हुने भएको छ । २० वर्ष उमेरसम्मका खेलाडी खेलमा सहभागी हुन पाउने गरी अशोक स्मृति कप फुटबल प्रतियोगिता सञ्चालन गर्न लागिएको हो । दि फेमस महिन्द्र दल गण भूपू र न्यू डाँफे स्पोर्ट्स क्लबको संयुक्त आयोजनामा खजुरा डि-गाउँस्थित मिनी रंगशालामा वैशाख २७ गतेदेखि सञ्चालन गरिने आयोजक दि फेमस महिन्द्र दल गणका भूपू अध्यक्ष कृष्णलाल गिरीले जानकारी दिए । जिल्ला र पालिकामा दर्ता भएका १२ टिमको प्रतियोगितामा सहभागिता रहने न्यू डाँफे स्पोर्ट्स क्लबका अध्यक्ष बालराम खत्रीले जानकारी दिए । नेपाली सेनामा कार्यरत रहेका अशोक बिक फुटबल खेलाडी समेत रहेका थिए ।

खेलाडी विकको स्मृतिमा हुन लागिरहेको फुटबल प्रतियोगितामा विजेता हुने टिमले नगद ५१ हजार, ट्रफी, मेडल र प्रमाणपत्र प्राप्त गर्नेछन् भने उपविजेता टिमले नगद ३१ हजार, ट्रफी, मेडल र प्रमाणपत्र प्राप्त गर्ने महिन्द्र दल गण भूपूका कोषाध्यक्ष बलबहादुर खड्काले बताए । खेल नकआउट प्रक्रियामा सञ्चालन गरिने शनिबार पत्रकार सम्मेलनमार्फत जानकारी दिइएको छ । प्रतियोगिताको प्रथम राशी मुख्य आयोजक महिन्द्र दल गढ भूपुले र दोस्रो पुरस्कार राशी स्वर्गीय अशोकका भाइ तथा न्यु डाँफे स्पोर्ट्स क्लबका पूर्व अध्यक्ष हरिप्रकाश विकले बेहोर्ने पत्रकार सम्मेलनमा जनाइएको छ । प्रतियोगितामा विधागत पुरस्कारहरू समेत प्रदान गरिने विकले जानकारी दिए ।

प्रतियोगितामा अल राउन्ड बेष्ट खेलाडीलाई हिरोको साइकल प्रदान गरिनेछ । यस्तै अन्य विधागत उत्कृष्ट खेलाडीलाई नगद २५०० का दरले पुरस्कृत गरिने आयोजकले जनाएको छ । प्रतियोगितामा हरेक दिनको उत्कृष्ट खेलाडीलाई १ हजार नगदसहित पुरस्कृत गरिने आयोजकले जनाए । पत्रकार सम्मेलनमा भूपू समितिका पदाधिकारी, न्यू डाँफे स्पोर्ट्स क्लबका पूर्व अध्यक्ष लोक बहादुर खत्री, निवर्तमान अध्यक्ष तिलकबिर सुनार लगायतले शुभकामना मन्तव्य राखेका थिए ।

प्रकाशित मिति: शनिबार, वैशाख १९, २०८३ १७:२५

प्रतिक्रिया दिनुहोस्