नेपाल पुलिस क्लब कोहलपुर गोल्डकपको फाइनलमा

खेलकुद

गृहपृष्ठ
खेलकुद
नेपाल पुलिस क्लब कोहलपुर गोल्डकपको फाइनलमा

नेपाल पुलिस क्लब कोहलपुर गोल्डकपको फाइनलमा

बिहीबार, वैशाख २४, २०८३ बागेश्वरी पोस्ट

नेपालगञ्ज । नेपाल पुलिस क्लब कोहलपुर गोल्डकप फुटबल प्रतियोगिताको फाइनलमा प्रवेश गरेको छ । यो संगै पुलिसले आयोजक कोहलपुर रेसिङ सहारा क्लबसंगको फाइनल भिडन्त पक्का गरेको छ । बाँकेको कोहलपुरमा जारी चौथो संस्करणको कोहलपुर गोल्डकप प्रतियोगिताको दोस्रो सेमिफाइनल खेलमा रोयल फुटबल क्लब (कर्णाली) लाई टाइब्रेकरमा ५-३ गोलले पराजित गर्दै पुलिस फाइनलमा प्रवेश गरेको हो । खेल निर्धारित ९० मिनेटको समयमा बराबरीमा सकिएपछि निर्णय टाइब्रेकरमा पुगेको थियो ।

टाइब्रेकरमा पुलिसका कप्तान राम वगाले, सञ्जिव लामा, हेमन्त श्रेष्ठ, सुजन मगर र अनिल टमाटाले गोल गर्दै टिमलाई जित दिलाए । रोयलका करण शाही, दिवश विसी र विक्रम अली मात्र सफल भए । कप्तान सुदन विकको सुरूकै प्रहार गोलपोष्टबाट बाहिरिएपछि रोयलमाथि दबाब बढेको थियो । खेल अवधिभर उत्कृष्ट प्रदर्शन गरेका गणेश पुन मगर ‘प्लेयर अफ द म्याच’ घोषित भए । उनले ५ हजार रुपैयाँ र ट्रफी प्राप्त गरे । शनिबार फाइनल खेल हुनेछ ।

स्मरणीय छ, वर्क परमिट नलिएका बिदेशी खेलाडी सहभागी नगराउन जिल्ला प्रशासन कार्यालय बाँकेले निर्देशन दिएपछि दोस्रो सेमिफाइनल खेलको समिकरण बदलिएको हो । लिग चरणको खेल जितेर सेमिफाइनलमा पुगेको जस्ट जोन एफसी (नाइजेरिया) को टिम वर्क परमिटका कारण प्रतियोगिताबाट बाहिरिएपछि जस्ट जोन एफसीको स्थानमा रोयल फुटबल क्लब (कर्णाली प्रदेश) ले मौका पाएको हो ।

प्रतियोगितामा आयोजक कोहलपुर रेसिङ सहारा क्लब, पञ्चकोशी युवा क्लब, लालीगुराँस एसोसिएसन क्लब, सातदोबाटो युवा क्लब, जस्ट जोन एफसी (नाइजेरिया), रोयल फुटबल क्लब (कर्णाली), राइजिङ स्टार क्लब (नवलपरासी) र नेपाल पुलिस क्लब सहभागी छन् ।

प्रतियोगिताको विजेताले आठ लाख र उपविजेताले चार लाख रुपैयाँ नगद पुरस्कार प्राप्त गर्नेछन् । कोहलपुर-२ स्थित तेह्र बिघा खेल मैदानमा गत शनिबारदेखि प्रतियोगिता सुरु भएको हो । प्रतियोगिता बैशाख २६ गतेसम्म चल्नेछ ।

प्रकाशित मिति: बिहीबार, वैशाख २४, २०८३ २०:५३

प्रतिक्रिया दिनुहोस्