अक्कल र सन्तोषीलाई दोस्रो नेपालगञ्ज १० म्युजिक नाइट रनको उपाधि

खेलकुद

गृहपृष्ठ
खेलकुद
अक्कल र सन्तोषीलाई दोस्रो नेपालगञ्ज १० म्युजिक नाइट रनको उपाधि

अक्कल र सन्तोषीलाई दोस्रो नेपालगञ्ज १० म्युजिक नाइट रनको उपाधि

शनिबार, वैशाख २६, २०८३ बागेश्वरी पोस्ट

नेपालगञ्ज । दोस्रो नेपालगञ्ज १० म्युजिक नाइट रनको उपाधि नेपाली सेनाका अक्कल बहादुर पाल र धादिङकी सन्तोषी श्रेष्ठले जितेका छन् । वल्र्ड रनिङको आधिकारिक संस्था एसोसियसन अफ इन्टरनेशनल म्याराथन एण्ड डिस्टेन्स रेस (एम्स) बाट प्रमाणीकरण भएको रुटमा शनिवार राति भएको रोड रेसमा १० किमी खुला पुरुषतर्फ अक्कलले ३२ः१८ः०० मिनेटमा निर्धारित दुरी पूरा गर्दै प्रथम हुँदा भुपेन्द्र सुनार दोस्रो भए । उनले ३३ः०४ः७७ मिनेटमा दुरी पूरा गरे । यसमा बाँके नरैनापुरका अरविन्द यादवले ३३ः०८ः०९ मिनेटमा निर्धारित दुरी पूरा गर्दै तेस्रो भए ।

महिला १० किमीतर्फ धादिङकी सन्तोषीले ३९ः०९ः०० मिनेटमा दुरी पूरा गर्दा बाँके कोहलपुरकी दीपशीखा शाही ४४ः५८ः१३ मिनेटमा पूरा गरी दोस्रो भइन् । यसमा बाँके नरैनारपुरकी गीता साहु ५२ः२६ः३० मिनेटका साथ तेस्रो भइन् । गीता पहिलो संस्करणकी विजेता हुन् । संगीत र खेलकुदमार्फत सामाजिक एकता, स्वस्थ समाज र रात्रीकालीन बजारलाई प्रवद्र्धन गर्ने हेतुले आयोजित रोड रेसमा भेट्रान (४५ बर्षमाथि) १० किमी तर्फको उपाधि बाँके खजुराका ५५ बर्षिय भरत श्रेष्ठले जिते । उनले ५१ः०३ः१७ मिनेटमा दुरी पूरा गरे । यसमा बर्दिया गुलरियाका ६९ बर्षिय पुष्कर विश्वकर्मा १ः००ः४४ समयका साथ दोस्रो र नेपालगञ्जका ६९ बर्षिय मंगले तामाङ १ः०३ः५९ समयका साथ तेस्रो भए ।

स्कुल स्तरीय ५ किमी दौडमा छात्रतर्फ समीर बस्नेत, बसन्त माझी र नरेश कुवँर पहिलो, दोस्रो र तेस्रो भए भने छात्रातर्फ स्वस्तिका शाही, अप्सरा बम ठकुरी र जनदेवी महतारा शीर्ष तीन स्थानमा आए । विजेता खेलाडीलाई लुम्बिनी प्रदेश सभा सदस्य मीना श्रेष्ठ, लुम्बिनी प्रदेश खेलकुद परिषदका सदस्य सचिव तिरनदाज गौतम, पूर्व सदस्य सचिव भीम ओली, आयोजक क्रियटिभ गञ्जका अध्यक्ष टीएस ठकुरी, पत्रकार महासंघ बाँकेका उपाध्यक्ष करुणा शाह लगायतले नगद तथा पदकबाट पुरस्कृत गरेका थिए । रात्रीकालीन बजारलाई प्रवद्र्धन गर्न आयोजना गरिएको म्युजिक नाइट रनमा राष्ट्रिय स्तरका गायक सुनिल सिंह ठकुरीले बेजोड सांगीतिक प्रस्तुति दिएका थिए । सार्थ इन्टिग्रेटेड स्कुलका छात्रछात्राले नृत्य प्रस्तुत गरेका थिए । नेपालगञ्ज १० नाइट रन एम्सको पूर्णकालीन सदस्य हो । नेपालमा एम्स आवद्ध दुई रेस हुने नेपालगञ्ज एक मात्र सहर हो ।

यस अघि नेपालगञ्जमा पहिलोपटक ‘स्कुल टु ओलम्पिक’ कार्यक्रम भव्य रुपमा आयोजना गरिएको थियो । नेपाल ओलम्पियन एसोसियसन, रेस नेपाल र क्रियटिभ गञ्जको संयुक्त आयोजनामा भएको स्कुल टु ओलम्पिक कार्यक्रममा नेपालका सर्वाधिक सफल खेलाडी ओलम्पियन दीपक बिष्ट, ओलम्पियन देबु थापा, ओलम्पियन सन्तोषी श्रेष्ठ, साग दोहोरो स्वर्ण पदक विजेता दीपक श्रेष्ठ, साग स्वर्ण विजेता जुनु राई, पहिलो पुस्ताका ओलम्पियन सुरेन्द्र हमाल र पहिलो नेपाली महिला ओलम्पियन पार्वती थापाले विभिन्न स्कुलबाट सहभागी विद्यार्थीहरुसँग अन्तरक्रिया गरेका थिए । नेपाली राष्ट्रिय क्रिकेट टोलीका पूर्व उपकप्तान एवं सञ्चारकर्मी ममता थापाले सहजीकरण गरेको स्कुल टु ओलम्पिक कार्यक्रम निकै उत्प्रेरणामूलक र फलदायी रहेको थियो ।

स्कुल टु ओलम्पिक सफल पार्न योगदान गर्ने नेपालगञ्ज उपमहानगरपालिका, होटल डायमन्ड प्यालेसका प्रबन्ध निर्देशक जीवनसिंह ठकुरी, केएल दुगड ग्रुपका सिइओ प्रदीप छाजेडलाई सम्मान गरिएको थियो । स्कुल टु ओलम्पिक कार्यक्रममा एन्जल्स स्कुल, नेपालगञ्ज मोडल एकेडेमी, कन्या मावि सल्यानीबाग सहभागी थिए । स्कुल टु ओलम्पिक हरेक बर्ष बाँकेका विभिन्न पालिकाहरुमा आयोजना गरिने रेस नेपालले जनाएको छ ।

प्रकाशित मिति: शनिबार, वैशाख २६, २०८३ १३:५८

प्रतिक्रिया दिनुहोस्