आजदेखि सुरु हुँदै प्रथम अशोक स्मृति कप फुटबल

खेलकुद

गृहपृष्ठ
खेलकुद
आजदेखि सुरु हुँदै प्रथम अशोक स्मृति कप फुटबल

आजदेखि सुरु हुँदै प्रथम अशोक स्मृति कप फुटबल

आइतबार, वैशाख २७, २०८३ बागेश्वरी पोस्ट

खजुरा । प्रथम अशोक स्मृति कप फुटबल प्रतियोगिता आज आइतबारदेखि खजुरामा सुरु हुँदैछ । स्थानीय खेलाडीहरुलाई प्राथमिकता दिएर आयोजना गर्न लागिएको प्रतियोगिताको तयारी पूरा भएको आयोजक दि फेमस महिन्द्र दल गण भु.पु संघ बाँकेले जनाएको छ ।

सुन्दर विहानी युवा क्लब जानकी गाउँपालिका–४ बाँकेको सह-आयोजनामा हुन लागेको प्रतियोगिताको उद्घाटन खेलमा न्यु डाँफे स्पोर्ट्स क्लब र कालिका युवा क्लबले प्रतिस्पर्धा गर्ने भएका छन् । जेठ ३ गतेसम्म चल्ने प्रतियोगितामा १२ टिमको सहभागिता रहेको छ ।

बाँके खजुरा गाउँपालिका-४ डी गाउँस्थित मिनी रंगशालामा हुने प्रतियोगिताको विजेता टिमले ५१ हजार रुपैयाँ, उपविजेताले ३१ हजार रुपैयाँ, ट्रफी, मेडल, प्रमाणपत्र पाउने आयोजक दि फेमस महिन्द्र दल गण भु.पु संघ बाँके अध्यक्ष कृष्णलाल गिरीले बताए । प्रतियोगिताको सर्वोत्कृष्ट खेलाडीलाई ५ हजार रुपैयाँ, सर्वाधिक गोलकर्ता र उत्कृष्ट गोलकिपरलाई जनही २ हजार ५ सय रुपैयाँ, ट्रफी, प्रमाणपत्र प्रदान गरिनेछ ।

प्रतियोगिताको प्रथम पुरस्कार रकम ५१ हजार रुपैयाँ खजुरा गाउँपालिका वडा नम्बर ४ निवासी हाल अमेरिकामा रहेका समाजसेवी तथा खेलप्रेमी लील बहादुर थापाले प्रायोजन गरेको प्रतियोगिता संयोजक एवम् खजुरा गाउँपालिका वडा नम्बर ४ का निवर्तमान वडा अध्यक्ष तिलकवीर सुनारले जानकारी दिए । यसैगरी प्रतियोगितालाई मुख्य प्रायोजन स्व.अशोक विकका भाई एलिसा ज्वैलर्सका प्रो. खजुरा गाउँपालिका वडा नम्बर ४ निवासी हरि प्रकाश विकले गरेको आयोजकले जनाएको छ ।

स्थानीय स्तरका खेलाडीलाई खेल्ने अवसर प्रदान गर्दै प्रतिभावान खेलाडी उत्पादन गर्ने लक्ष्यसहित आयोजना गर्न लागिएको प्रतियोगितामा १२ क्लबको सहभागिता रहेको छ । प्रतियोगितामा कालिका युवा क्लब, न्यु डाँफे स्पोर्ट्स क्लब, मोडेल एफसी, धम्बोझी एफसी, न्यु दर्पण स्पोर्ट्स क्लब, ब्रदर्श एफसी, सिमलघारी, चन्द्र ज्योति, खजुरा–११ (आयोजक), योगिनी युवा क्लब, बागमति युवा क्लब र महिन्द्र दल गण भुपुको सहभागिता रहेको छ ।

प्रकाशित मिति: आइतबार, वैशाख २७, २०८३ १०:५२

प्रतिक्रिया दिनुहोस्