पूर्व खेलाडी समाज बाँकेले स्विमिङ, शारीरिक सुगठन तथा हक्की प्रतियोगिता गर्दै

खेलकुद

गृहपृष्ठ
खेलकुद
पूर्व खेलाडी समाज बाँकेले स्विमिङ, शारीरिक सुगठन तथा हक्की प्रतियोगिता गर्दै

पूर्व खेलाडी समाज बाँकेले स्विमिङ, शारीरिक सुगठन तथा हक्की प्रतियोगिता गर्दै

बिहीबार, जेठ २८, २०८३ बागेश्वरी पोस्ट

नेपालगञ्ज । पूर्व खेलाडी समाज बाँकेले स्विमिङ, शारीरिक सुगठन तथा हक्की प्रतियोगिता आयोजना गर्ने भएको छ । खेलकुद गतिविधिलाई निरन्तरता दिने उद्देश्यले समाजले विभिन्न तीन विधाका प्रतियोगिता सञ्चालन गर्न लागेको हो । नेपालगञ्जमा आज पत्रकार सम्मेलनको आयोजना गरेर प्रतियोगिताबारे जानकारी गराइएको हो ।

समाजका अध्यक्ष प्रकाश बहादुर श्रेष्ठद्वारा जारी प्रेस नोट अनुसार गत आर्थिक वर्ष २०८१/८२ मा ब्याडमिन्टन, भलिबल र स्विमिङ प्रतियोगिता सफलतापूर्वक सम्पन्न गरेको समाजले यस वर्ष पनि स्विमिङ, शारीरिक सुगठन र हक्की प्रतियोगिता आयोजना गर्न लागेको जनाएको छ ।

प्रतियोगिता अन्तर्गत जेठ २९ गते स्विमिङ, जेठ ३१ गते शारीरिक सुगठन तथा त्यसपछि महिला तथा पुरुष हक्की प्रतियोगिता सञ्चालन गरिनेछ । स्विमिङ र हक्की प्रतियोगिता नेपालगञ्ज रङ्गशाला परिसरमा तथा शारीरिक सुगठन प्रतियोगिता नेपालगञ्जको बिपी चोकस्थित सुनाखरी रेष्टुरेन्टको हलमा आयोजना हुने जनाइएको छ ।

स्विमिङ प्रतियोगितामा पाँच उमेर समूह अन्तर्गत ४ इभेन्ट समावेश गरिएको छ । छात्र–छात्रातर्फ १० वर्षमुनि, १२ वर्षमुनि, १४ वर्षमुनि र १७ वर्षमुनिका तथा पुरुषतर्फ ४० वर्षमाथिका खेलाडी सहभागी हुनेछन् । प्रतियोगिताका इभेन्टमा ५० मिटर फ्रिस्टाइल, ५० मिटर ब्याकस्ट्रोक र ५० मिटर बटरफ्लाई एवम् ब्रेष्टस्ट्रोक समावेश छन् ।

त्यसैगरी हक्की प्रतियोगिता लिग कम नकआउट प्रणालीमा सञ्चालन हुनेछ भने शारीरिक सुगठन प्रतियोगितामा ५० केजी तौल समूहदेखि ७५ प्लस तौल समूहसम्मका खेलाडीले प्रतिस्पर्धा गर्नेछन् । तीन वटै प्रतियोगिताको कुल अनुमानित लागत करिब ८ लाख रुपैयाँ रहेको समाजले जनाएको छ । लागत व्यवस्थापनका लागि नेपालगञ्ज उपमहानगरपालिकाले ४ लाख रुपैयाँ तथा वडा नम्बर २ कार्यालयले २ लाख ५० हजार रुपैयाँ सहयोग गरेको छ । बाँकी १ लाख ५० हजार रुपैयाँ विभिन्न व्यवसायिक प्रतिष्ठान तथा पूर्व खेलाडी समाज बाँकेको आन्तरिक स्रोतबाट जुटाइने जनाइएको छ ।

अध्यक्ष श्रेष्ठले प्रतियोगिताका गतिविधिलाई सञ्चारमाध्यममार्फत व्यापक रूपमा प्रचार–प्रसार गरिदिन सञ्चारकर्मीहरूसँग आग्रह गरेका छन् । पत्रकार सम्मेलनको संयोजन एवम् सञ्चालन समाजका सचिव नरेन्द्र थापाले गरेका थिए । त्यस अवसरमा नेपाल पत्रकार महासंघ बाँकेका अध्यक्ष नवीन गिरीले प्रतियोगिता सफलताको शुभकामना ब्यक्त गरेका थिए । पत्रकार सम्मेलनमा पत्रकारहरुले विभिन्न जिज्ञासा राखेका थिए ।

प्रकाशित मिति: बिहीबार, जेठ २८, २०८३ २०:४८

प्रतिक्रिया दिनुहोस्