मेयर कप अन्तर विद्यालय फुटबलः कृष्ण मावि, ज्ञानोदय, पशुपति र सेन्टथोमस विजयी

खेलकुद

गृहपृष्ठ
खेलकुद
मेयर कप अन्तर विद्यालय फुटबलः कृष्ण मावि, ज्ञानोदय, पशुपति र सेन्टथोमस विजयी

मेयर कप अन्तर विद्यालय फुटबलः कृष्ण मावि, ज्ञानोदय, पशुपति र सेन्टथोमस विजयी

बिहीबार, जेठ २८, २०८३ बागेश्वरी पोस्ट

नेपालगञ्ज । बाँके जिल्ला फुटबल संघले आयोजना गरेको बाँके जिल्ला स्तरीय मेयर कप अन्तर विद्यालय छात्र-छात्रा (यु-१८) फुटबल प्रतियोगितामा पशुपति मावि राँझा, जयबागेश्वरी नेपालगञ्ज, कृष्ण मावि कोहलपुर र ज्ञानोदय मावि खजुरा विजयी भएका छन् । पशुपतिले सेन्टथोमस, जयबागेश्वरीले ड्रिमल्याण्ड स्कुल, कृष्ण माविले नेपालगञ्जको मनकामना मावि र ज्ञानोदयले योगिनी मावि गौघाटलाई पराजित गरेका हुन् ।

बिहानको पहिलो खेलमा कृष्ण माविले मनकामनालाई ३-० गोल अन्तरले पराजित गर्यो । कृष्ण माविका पवल परियारले ९ र ५० मिनेट र जोकिरण विकले १३ मिनेटमा गोल गरेका थिए । यो खेलमा कृष्ण माविका पवल परियार प्लेयर अफ द म्याच भए । उनलाई बाँके जिल्ला खेलकुद विकास समितिका प्रमुख सन्तोष श्रेष्ठले पुरस्कृत गरे ।

अर्को खेलमा ज्ञानोदयले योगिनी माविलाई २-० गोलले पराजित गर्यो । ज्ञानोदयका निशान विकले दुवै गोल गरे । उनले १३ र ४० मिनेटमा गोल गरेका थिए । प्लेयर अफ द म्याच भएका निशानलाई ज्ञानोदय मावि विद्यालय व्यवस्थापन समितिका सदस्य विजय गुरुङ र वडा प्रहरी कार्यालय नेपालगञ्जका प्रहरी सहायक निरीक्षक कमला जोशीले पुरस्कृत गरे ।

साँझको पहिलो खेलमा पशुपतिले टाइब्रेकरमा सेन्टथोमसलाई ३-० गोलले पराजित गर्यो । पशुपतिका इसाक बुढा, हेमन्त बस्नेत र अभिषेक थापाले गोल गरे । दिपेश सार्कीले गोल गर्न सकेनन् । सेन्टथोमसका धनराज विकले मात्र गोल गर्न सके । राजेन्द्र विक, प्रशान्त क्षेत्री र विक्रम महतले गोल गर्न सकेनन् । यो खेलमा पशुपतिका गोलकिपर प्लेयर अफ द म्याच भए । उनलाई पत्रकार कुमार श्रेष्ठले पुरस्कृत गरे ।

अर्को खेलमा जयबागेश्वरीले ड्रिमल्याण्डलाई १-० गोलले पराजित गर्यो । २१ मिनेटमा विक्रम चौधरीले गरेको गोल नै निर्णायक भएको थियो । जयबागेश्वरीका किपर विशेष थारु प्लेयर अफ द म्याच भए । उनलाई अनुसन्धान सहायक चिजमान थारुले पुरस्कृत गरे ।

नेपालगञ्ज उपमहानगरपालिकाको सहयोगमा सञ्चालित प्रतियोगितामा ३७ वटा विद्यालयले भाग लिएका छन् । प्रतियोगिताका विजेतालाई ३१ हजार र उपविजेतालाई १६ हजार तथा सर्वोत्कृष्ट खेलाडीलाई दुई हजार पाँच सय पुरस्कार राखिएको एन्फाका केन्द्रीय सदस्य तथा बाँके जिल्ला फुटबल संघका अध्यक्ष भोजराज शाहीले जानकारी दिए ।

प्रकाशित मिति: बिहीबार, जेठ २८, २०८३ २१:०१

प्रतिक्रिया दिनुहोस्