विश्वकप २०२६ को उद्घाटनमा मेक्सिको विजयी, ३ वटा रातो कार्ड

खेलकुद

गृहपृष्ठ
खेलकुद
विश्वकप २०२६ को उद्घाटनमा मेक्सिको विजयी, ३ वटा रातो कार्ड

विश्वकप २०२६ को उद्घाटनमा मेक्सिको विजयी, ३ वटा रातो कार्ड

शुक्रबार, जेठ २९, २०८३ बागेश्वरी पोस्ट

नेपालगन्ज । फिफा विश्वकप २०२६ को उद्घाटन खेलमा सहआयोजक मेक्सिकोले दक्षिण अफ्रिकालाई २–० ले पराजित गर्दै प्रतियोगितामा सुखद सुरुआत गरेको छ ।

मेक्सिको सिटीस्थित ऐतिहासिक अज्टेका स्टेडियममा खचाखच दर्शकमाझ सम्पन्न खेलमा घरेलु टोलीका जुलियन क्विनोनेस र राउल जिमेनेजले एक–एक गोल गरे । विश्वकपको इतिहासमा तीन संस्करणको आयोजना गर्ने पहिलो रंगशाला बनेको अज्टेकामा मेक्सिकोले सुरुदेखि नै आक्रामक खेल प्रदर्शन गरेको थियो ।

खेलको नवौं मिनेटमै क्विनोनेसले गोल गर्दै मेक्सिकोलाई अग्रता दिलाए । दक्षिण अफ्रिकी रक्षापंक्तिको गल्तीको फाइदा उठाउँदै उनले इरिक लिराको पासलाई जाली चुमाएका थिए । पहिलो हाफमै उनले अर्को अवसर सिर्जना गरे पनि उनको प्रहार पोस्टमा लागेर फर्किएको थियो ।

दक्षिण अफ्रिकाका सेफेलो सिथोले ४९औं मिनेटमा विपक्षी खेलाडीमाथि फाउल गरेपछि सिधै रातो कार्ड पाए । त्यसपछि १० खेलाडीमा सीमित भएको टोली थप दबाबमा परेको थियो ।

मेक्सिकोले ६७औं मिनेटमा दोस्रो गोल थप्यो । अनुभवी फरवार्ड राउल जिमेनेजले उत्कृष्ट फिनिसिङ गर्दै टोलीको अग्रता दोब्बर बनाए ।

दक्षिण अफ्रिकाको अवस्था झन् कठिन बन्दा ८४औं मिनेटमा थेम्बा ज्वाने पनि रातो कार्ड खाँदै मैदानबाट बाहिरिए । नौ खेलाडीमा झरेको दक्षिण अफ्रिकाले बाँकी समय संघर्ष गरे पनि खेलमा फर्किन सकेन ।

यता, इन्जुरी समयमा मेक्सिकोका सेजर मोन्टेसले पनि रातो कार्ड पाए । यससँगै उद्घाटन खेलमा कुल तीन खेलाडी मैदानबाट निष्कासित भए ।

यस जितपछि समूह ‘ए’ मा रहेको मेक्सिकोले महत्वपूर्ण तीन अंक बटुलेको छ । पराजयसँगै दक्षिण अफ्रिकामाथि आगामी खेलहरूमा नतिजा निकाल्ने दबाब बढेको छ ।

प्रकाशित मिति: शुक्रबार, जेठ २९, २०८३ ०७:३२

प्रतिक्रिया दिनुहोस्