विश्वकप २०२६ : ब्राजिल मोरक्कोसँग बराबरीमा रोकियो, कतार र स्विट्जरल्यान्डले पनि अंक बाँडे

खेलकुद

गृहपृष्ठ
खेलकुद
विश्वकप २०२६ : ब्राजिल मोरक्कोसँग बराबरीमा रोकियो, कतार र स्विट्जरल्यान्डले पनि अंक बाँडे

विश्वकप २०२६ : ब्राजिल मोरक्कोसँग बराबरीमा रोकियो, कतार र स्विट्जरल्यान्डले पनि अंक बाँडे

आइतबार, जेठ ३१, २०८३ बागेश्वरी पोस्ट

काठमाडौँ । फिफा विश्वकप २०२६ अन्तर्गत समूह चरणको खेलमा पाँच पटकको विश्व विजेता ब्राजिलले विजयी सुरुआत गर्न सकेन । न्यू जर्सीस्थित मेटलाइफ रंगशालामा भएको समूह ‘सी’ को खेलमा ब्राजिल अफ्रिकी टोली मोरक्कोसँग १–१ गोलको बराबरीमा रोकिएको हो ।

खेलको २१औँ मिनेटमा इस्माइल साइबारीले गोल गर्दै मोरक्कोलाई अग्रता दिलाएका थिए । त्यसपछि ३२औँ मिनेटमा भिनिसियस जुनियरले बराबरी गोल गर्दै ब्राजिललाई खेलमा फर्काए । ब्रुनो गुइमाराएसको पासमा भिनिसियसले गोल गरेका हुन् ।

मध्यान्तरसम्म ब्राजिलले ५४ प्रतिशत बल नियन्त्रण राखेको थियो भने खेल सकिँदा त्यो ५२ प्रतिशतमा झरेको थियो । दोस्रो हाफमा दुवै टोलीले केही अवसर सिर्जना गरे पनि थप गोल निस्कन नसक्दा अंक बाँड्न बाध्य भए ।

सातौँ विश्वकप खेलिरहेको मोरक्कोलाई यस संस्करणको सम्भावित ‘डार्क हर्स’ का रूपमा हेरिएको छ । उता, ब्राजिलका स्टार खेलाडी नेइमार भने ‘काल्फ इन्जुरी’ का कारण मैदानमा उपस्थित थिएनन् ।

यता, समूह चरणकै अर्को खेलमा कतारले अन्तिम समयमा गोल फर्काउँदै स्विट्जरल्यान्डसँग १–१ को बराबरी खेल्दै विश्वकपमा महत्वपूर्ण अंक जोडेको छ ।

क्यालिफोर्नियाको सान फ्रान्सिस्को बे एरिया रंगशालामा भएको खेलमा स्विट्जरल्यान्डले १७औँ मिनेटमा पेनाल्टीमार्फत अग्रता लिएको थियो । कतारी गोलकिपर महमूद अबुनादाले डिबक्सभित्र विपक्षी खेलाडीलाई लडाएपछि प्राप्त पेनाल्टीलाई ब्रेल एम्बोलोले गोलमा परिणत गरेका थिए ।

खेलभर स्विट्जरल्यान्डले दबाब कायम राख्दै बल नियन्त्रण र अवसर सिर्जनामा प्रभुत्व जमाए पनि दोस्रो गोल गर्न सकेन । त्यसको फाइदा उठाउँदै कतारले इन्जुरी समयमा बराबरी गोल फर्कायो । अतिरिक्त समयमा बोउलेम खोउखीले हेडमार्फत गोल गर्दै कतारलाई हारबाट जोगाए ।

सन् २०२२ को विश्वकपमा आयोजक राष्ट्रका रूपमा खेलेको कतारले त्यसबेला कुनै अंक जोड्न सकेको थिएन । तर, यसपटक छनोट चरण पार गरेर विश्वकप पुगेको कतारले पहिलो खेलमै स्विट्जरल्यान्डबाट अंक खोस्दै सुखद सुरुआत गरेको छ ।

प्रकाशित मिति: आइतबार, जेठ ३१, २०८३ ०६:३६

प्रतिक्रिया दिनुहोस्