फिफा विश्वकप: इरान–न्युजिल्यान्डको रोमाञ्चक ड्र, स्पेन र उरुग्वे पनि जितविहीन

खेलकुद

गृहपृष्ठ
खेलकुद
फिफा विश्वकप: इरान–न्युजिल्यान्डको रोमाञ्चक ड्र, स्पेन र उरुग्वे पनि जितविहीन

फिफा विश्वकप: इरान–न्युजिल्यान्डको रोमाञ्चक ड्र, स्पेन र उरुग्वे पनि जितविहीन

मंगलबार, असार २, २०८३ बागेश्वरी पोस्ट

काठमाडौँ । फिफा विश्वकप २०२६ अन्तर्गत समूह ‘जी’ को खेलमा इरान र न्युजिल्यान्डले २–२ गोलको रोमाञ्चक बराबरी खेल्दै अंक बाँडेका छन् । दुवै टोलीले आक्रमक खेल प्रदर्शन गरेपछि खेल बराबरीमा टुंगिएको हो ।

खेलको सातौँ मिनेटमा एलिजाह जस्टले गोल गर्दै न्युजिल्यान्डलाई अग्रता दिलाएका थिए । पहिलो हाफमा रामिन रेजाइयानले गोल फर्काउँदै इरानलाई १–१ को बराबरीमा ल्याए ।

दोस्रो हाफको ५५औँ मिनेटमा जस्टले व्यक्तिगत दोस्रो गोल गर्दै न्युजिल्यान्डलाई पुनः २–१ को अग्रता दिलाए । तर, ६४औँ मिनेटमा मोहम्मद मोहिबीले गोल गरेपछि इरान खेलमा फर्कियो र खेल २–२ को बराबरीमा सकियो ।

यो नतिजासँगै समूह ‘जी’ मा रहेका इरान र न्युजिल्यान्डले एक–एक अंक जोडेका छन् । यस समूहमा इरान, न्युजिल्यान्ड, बेल्जियम र इजिप्ट रहेका छन् । बेल्जियम र इजिप्टले पनि १-१ गोलको बराबरी खेलेका थिए ।

त्यसैगरी समूह ‘एच’ मा विश्वकप डेब्यु गरिरहेको केप भर्डेले युरोपेली च्याम्पियन स्पेनलाई गोलरहित बराबरीमा रोक्दै ठूलो सनसनी मच्चायो । एटलान्टामा भएको खेलमा स्पेनले बलमाथि अधिकांश समय नियन्त्रण राखे पनि केप भर्डेको अनुशासित रक्षापङ्क्ति भेद्न सकेन । फिफा विश्वकप २०२६ अन्तर्गत समूह चरणका खेलहरूमा अपेक्षाकृत कमजोर मानिएका टोलीहरूले प्रभावशाली प्रदर्शन गर्दै बलिया प्रतिद्वन्द्वीलाई अंक बाँड्न बाध्य पारेका छन् ।

यही समूहको अर्को खेलमा साउदी अरेबिया र उरुग्वेले १–१ को बराबरी खेले । खेलको ४१औँ मिनेटमा अब्दुलेलाह अल-अम्रीको गोलमार्फत साउदी अरेबियाले अग्रता लिए पनि उरुग्वेका म्याक्सी अराउजोले ८०औँ मिनेटमा गोल गर्दै टोलीलाई हारबाट जोगाए ।

समूह ‘जी’ मा पहिलो खेलमा बेल्जियम र इजिप्टले १–१ को रोमाञ्चक बराबरी खेले । इमाम अशोरको गोलबाट इजिप्टले पहिलो हाफमा अग्रता लिए पनि दोस्रो हाफमा मोहम्मद हानीको आत्मघाती गोलका कारण बेल्जियम खेलमा फर्कियो । त्यसपछि दुवै टोलीले जितका लागि प्रयास गरे पनि थप गोल हुन सकेन ।

प्रकाशित मिति: मंगलबार, असार २, २०८३ ०९:०२

प्रतिक्रिया दिनुहोस्