बाँके जिल्ला स्तरीय मेयर कप फुटबलमा होलिल्याण्ड र एनएमए च्याम्पियन

खेलकुद

गृहपृष्ठ
खेलकुद
बाँके जिल्ला स्तरीय मेयर कप फुटबलमा होलिल्याण्ड र एनएमए च्याम्पियन

बाँके जिल्ला स्तरीय मेयर कप फुटबलमा होलिल्याण्ड र एनएमए च्याम्पियन

मंगलबार, असार ९, २०८३ बागेश्वरी पोस्ट

नेपालगञ्ज । बाँके जिल्ला स्तरीय मेयर कप अन्तर विद्यालय छात्र–छात्रा यु–१८ फुटबल प्रतियोगितामा होलिल्याण्डको छात्र र नेपालगञ्ज मोडेल एकेडेमीको छात्रा टिम च्याम्पियन भएका छन् । छात्रतर्फ होलिल्याण्डले नेपालगञ्ज मोडेल एकेडेमीलाई सडेनडेथमा (५–४ गोल) पराजित गरेको छ । निर्धारित समयमा दुवै टोलीले १–१ गोल गरेका थिए ।

२४औं मिनेटमा अनमोल विकको गोलबाट होलिल्याण्डले अग्रता लिएको थियो । ४७औं मिनेटमा सुनिल थारुले गोल गरेर नेपालगञ्ज मोडेललाई खेलमा फर्र्काए । त्यसपछि दुवै टीमबाट गोल हुन नसकेपछि खेल टाइब्रेकरमा गएको थियो । जसमा होलिल्याण्डले सफलता प्राप्त गरेको थियो । होलिल्याण्डबाट अभिषेक थापा, आशिष कुमाई, मनिष सुनार, डानेल रोका मगर, अनमोल विकले गोल गरे । हिमाल पुरीको प्रहार नेपालगञ्ज मोडेलका गोलकिपर आयुष चन्दले रोक्न सफल भए ।

नेपालगञ्ज मोडेलबाट महेश शाही, आयुष चन्द, राज नेपाली र सुनिल थारुले गोल गरे भने पुष्कर मल्ल र निराजन शाहीले गोल गर्न सकेनन् । फाइनल खेलको प्लेयर अफ द म्याच होलिल्याण्डका गोलकिपर प्रविण सुनार भए । उनलाई एन्फा बाँकेका वरिष्ठ उपाध्यक्ष अनिल केसी र पूर्व खेलाडी निजामुद्दिन सिद्विकीले पुरस्कृत गरे ।

छात्रातर्फ नेपालगञ्ज मोडेल एकेडेमीले मनकामना इंग्लिश मिडियम स्कुललाई ३–० ले गोलले पराजित गरेको छ । नेपालगञ्ज मोडेलकी ज्योति कँडेलले सातौं र ३६औं मिनेट तथा विनिता चौधरीले २१औं मिनेटमा गोल गरे । फाइनल खेलको प्लेयर अफ द म्याच नेपालगञ्ज मोडेलकी ज्योति कँडेल भइन् । उनलाई बाँके जिल्ला महिला फुटबल समितिकी महासचिव सुमित्रा लामिछानेले पुरस्कृत गरिन् । प्रतियोगिताका छात्रतर्फका सर्वोत्कृष्ट खेलाडी होलिल्याण्डका अभिषेक थापा र छात्रामा नेपालगञ्ज मोडेल एकेडेमीकी भावना खड्का भइन् ।

विधागतमा उत्कृष्ट छात्रतर्फ होलिल्याण्डका गोलकिपर प्रवीण सुनार, रक्षकमा नेपालगञ्ज मोडेलका सुनिल थारु, मिडफिल्डमा नेपालगञ्ज मोडेलका गणेश सिंह ठकुरी, स्ट्राइकरमा होलिल्याण्डका अनमोल विक र उत्कृष्ट प्रशिक्षकमा होलिल्याण्डका जंगबहादुर थापा पुरस्कृत भए । छात्रामा उत्कृष्ट गोलकिपर मनकामना स्कुलकी प्रियंका विक, रक्षक, मिडफिल्डर, स्ट्राइकरमा नेपालगञ्ज मोडेलका क्रमशः शितल रोकाय, सविता चौधरी, ज्योति कँडेल तथा उत्कृष्ट प्रशिक्षकको रुपमा नेपालगञ्ज मोडेलका नरेन्द्र शाह पुरस्कृत भए ।

नेपालगञ्ज उपमहानगरपालिकाको सहयोगमा बाँके जिल्ला फुटबल संघले आयोजना गरेको प्रतियोगिताका विजेताले ३१ हजार र उपविजेताले १६ हजार पुरस्कार प्राप्त गरेको छ । विजेता, उपविजेता, विधागत उत्कृष्टलाई नेपालगञ्ज उपमहानगरपालिकाका मेयर प्रशान्त विष्ट, एन्फाका केन्द्रीय सदस्य एवं बाँके जिल्ला अध्यक्ष भोजराज शाही लगायतले पुरस्कृत गरे । जेठ २७ गतेदेखि सुरु भएको प्रतियोगितामा छात्रमा ३७ वटा र छात्रामा ११ वटा विद्यालयले भाग लिएका थिए ।

प्रकाशित मिति: मंगलबार, असार ९, २०८३ २१:४१

प्रतिक्रिया दिनुहोस्