विश्वकप २०२६ : पोर्चुगलको गोल वर्षा, क्रोएसियाको जित र इङ्ग्ल्यान्ड–घाना बराबरीले समूह चरण रोचक

खेलकुद

गृहपृष्ठ
खेलकुद
विश्वकप २०२६ : पोर्चुगलको गोल वर्षा, क्रोएसियाको जित र इङ्ग्ल्यान्ड–घाना बराबरीले समूह चरण रोचक

विश्वकप २०२६ : पोर्चुगलको गोल वर्षा, क्रोएसियाको जित र इङ्ग्ल्यान्ड–घाना बराबरीले समूह चरण रोचक

बुधबार, असार १०, २०८३ बागेश्वरी पोस्ट

काठमाडौँ । फिफा विश्वकप २०२६ अन्तर्गत गएराति र आज बिहान सम्पन्न समूह ‘के’ र ‘एल’ का खेलहरूले समूह चरणको प्रतिस्पर्धालाई थप रोमाञ्चक बनाएका छन्। पोर्चुगलले उज्बेकिस्तानमाथि फराकिलो जित निकाल्दा क्रोएसियाले पानामालाई पराजित गरेको छ भने इङ्ग्ल्यान्ड र घानाबीचको खेल गोलरहित बराबरीमा सकिएको छ।

समूह ‘के’ अन्तर्गत भएको खेलमा पोर्चुगलले उज्बेकिस्तानलाई ५–० गोलले हरायो। पोर्चुगलको जितमा क्रिस्टियानो रोनाल्डोले ६औँ र ३९औँ मिनेटमा दुई गोल गरे। नुनो मेन्डेसले १७औँ मिनेटमा गोल थप्दा उज्बेकिस्तानका ए. नेमाटोभबाट ६०औँ मिनेटमा आत्मघाती गोल भयो। खेलको ८७औँ मिनेटमा राफाएल लेआँओले गोल गर्दै पोर्चुगलको शानदार जित सुनिश्चित गरे। यस जितसँगै पोर्चुगलले नकआउट चरण प्रवेशको सम्भावना थप बलियो बनाएको छ।

यता समूह ‘एल’ को खेलमा क्रोएसियाले पानामालाई १–० गोलले पराजित गर्‍यो। प्रतिस्पर्धात्मक खेलमा क्रोएसियाका आन्ते बुडिमिरले ५४औँ मिनेटमा गरेको एकमात्र गोल नै निर्णायक बन्यो। महत्वपूर्ण जितसँगै क्रोएसियाले नकआउट चरण पुग्ने आशा कायम राखेको छ भने पानामामाथि दबाब बढेको छ।

यसै समूहको अर्को खेलमा इङ्ग्ल्यान्ड र घानाले गोलरहित बराबरी खेले। दुवै टोलीले अवसर सिर्जना गरे पनि गोल गर्न नसक्दा खेल ०–० मै टुंगियो। बराबरीसँगै दुवै टोलीले एक–एक अंक बाँडेका छन्।

समूह ‘एल’ मा इङ्ग्ल्यान्ड, घाना, क्रोएसिया र पानामा रहेका छन्। इङ्ग्ल्यान्ड–घाना बराबरी तथा क्रोएसियाको जितपछि यस समूहको नकआउट चरणको दौड अझ रोचक बनेको छ।

प्रकाशित मिति: बुधबार, असार १०, २०८३ ०७:४०

प्रतिक्रिया दिनुहोस्